Gestemerde Online

Gestemerdijên hêcayî û bi rîmetî,

Her çiqas ke ma dewe de nîme kî, ma bi can û royê xo her tim lêweyê cîrananê xo der îme. Cîrano rind roja tenge de kifş beno. Bav û kalê ma kî hem roja tenge de, hem kî roja rinde de piştî şanê piştî û jubînî rê wayîr vecîyayî û amayî nê rojan. Ma kî na nixta de gere naye rê wayîr vecîme. Xirabe ra durî biremîme. Cîrananê xo pêroyîne ju bizanîme û ju bicerime. No Ali beno, Welî beno, Mehemed beno… kam beno wa bibo, cara firqe wertê cîrananê xo mekeme. Heqa cîrantîye heqêde giran a. Ma ke na saate ra têpîya ravazîme zê cahîlan tayê çîyan dime kume, na kî êna a mana ke ma hona game ravê nêşîmê. Ma Gestemerde hona zê ju çêyî zanenîme. Na xana kor mekeme.

Biêrenê dest bidê destî, wa çerxê na xana seba her timî bicêro. Mi ra gore her çî ra ravê karo muhîm û ferz gere mûxtar, heyetê dewe û ma Gestemerdijî pêro-pîya jubîyena Gestemerdijan tayêna bikerîme qewîm û wa na jubîyena Gestemerdijan cara nêrijîyo. Kar û projeyanê dewe ra tewr muhîm, cîrantîya bav û kalî ya. Na cîrantîye ke ma dest ra şîye, qiymete çîyê nêmaneno.

Bêguman Gestemerde û Gestemerdijî hêcayê her çî yê. Lê nika ebe ju mûxtarî û bi komele (dernek) tenya kar raye ra nêşono. No kar û gure, û na xizmete giredayeyê yardim û destekê Gestemerdijan pêroyîn a. Kesî ke destek û yardim ci nêda, ne mûxtar şîkîno karê bikero, ne kî komele. Mûxtar û komela Çob-Derî ancax şîkînê na xizmete rê rayberîye bikerê. Ha eke qeweta Çob-Derî ke ca de bo, şîkîno gorê qeweta xo her sere karê xo verşano û bikero. Mumkin nîyo ke mordem nê kar û gureyê dewe ju rêye de bikero. Ancax gorê qeweta xo. Mi kî waşt ke derheqê kar û gureyê dewe de rêyê mûxtarî û sereke komela Çob-Derî M. Ali Kocadağî de xoşenere bikerî.

 Wusênê Gestemerde

**

Dosya Çob-Der'î

Wusênê Gestemerde: Ap Mehemed ti ke wazena, ma ravê dosya Çob-Derî ser ro dest bi xoşebera xo bikerîme. Çunke ti hem serekê komela Çob-Der (Çob-Der Başkanı) ya, hem kî mûxtarê dewe ya. Hawo bî di serî ke şima îdarekerê komele (Dernek Yönetim Kurulu) kar û gureyê komele raye ra benê û no kar û gureyo ke, yan kî xizmeta ke komele heyanî nîka dewe rê kerda, ti şîkîna ma rê nîya kilmek bi rêzê vacê?

M. Ali Kocadağ: Nika Wusêno bira na komele zaf çîyêde rind a. Mesela karê dewe ke bibo, ma vacîme rayî virazînê, mezelî virazînê, vayî vejînê, awi ênê, gere ke no kar binê ju çatî de raye ra bîşîyenê. Mesela cîranê ma amayî pêser qerar guret û komele qurmişkerde (saz kerde). Na proja mezelan de xêlê yardimê komele bî. Aye ra dime raya Golê Gamêşan, rayî û vayên zereyê deve viraştî. Seba silandê (çop) dewe, ma no hetê binê raya Keça de quya cayê silandî dê ra. Rêyêna par ke awa çundeyanê Derê Soyî ke dewe rê arde, komele xêlê destek da ci, hetê peran ra, hetê yardimî ra ci wayîr vecîye. Nawo emserî kî ma qerar gureto, vaya Hazir Babayî veceme, ame heyanî serê Bendî. No masrafê vaye kî rêyêna komele guret xo ser. Mesrafê na vaye pêro-pîya new mîlyarî (9 milyar) yê. Ma dest bi karê vayevetene kerdo. Vîzerî (19.09.09) ez, Hemed û şoferî ra şîme, ma lêweyê hegayanê çê Heydan ra heyanî serê bendî arde. No karê vaye hona niya devam keno.

W. Gestemerde: Na vaye zaf muhîme bîye, ke şima new milyarî (9 hezarî) pere xo çim ra vet? Gelo şima bi nê pereyî nêşkîyêne seba dewe xizmetêde bîne bikerdenê?

M. Ali Kocadag: Ûlahî, heya xêlê pere wo, nika Wusêno bira, vaye xêlê waxto nîyama vetene, bîya kore. Ma wazeme na awe bîyame hem seba malî, hem kî pê erazîyanê dewe awe dîme. Ju kî na vaye bi huyî û zengene nêna kinitene. Vero coyî milet dewe de zaf bî, her sere şîyene vaya Derê Soyî, vaya Hazir Babayî, vaya Merga Xalita, vaya Beja û vayên zereyê dewe pêro vetenê. Ca-cayê vaye kî laserî kerda xirabe. Heya cîranî qêret kenê, vazenê vecê, lê kes çîn o dewe de. No xora qerarê Îdarekeranê Komel o (Yönetim Kuruluyo). Ma Hüseyin Polat de qesekerd, ey kî hevalanê bînan de qese kerd û vat: „Madem ke şima munasib dîyo, ma kî tereftarê şima yime, û destek damê şima.“

W. Gestemerde: Na saate ra dime, plan û programê şima de, projeyêde newîye esta? Çunke xebera dewîjanê ma, plan û programê komele ra hondaye çîn a. No semed ra kî, ez bawer kena Gestemerdîjî tayê şikîyayî yê. Ti no derheq de se vana?

M. Ali Kocadağ: Tabî nika miletê ma zaf vilakerde yo. Ma wazeme ke xebera herkesî plan û programa komele ra bibo. Lê mordem ke programa xo kifş kerde û karê ke nêkerd, zureker vecîno. Mordem ke programe şana xo ver, gere ke bîyarone sere. Ma ke nîyard sere, nafa kî cîranî miradînê, dejenê. No sebeb ra kî ma nêda sîta dewe. Xora ma plan û programê xo kerdbî hazir. Hata Wusên Xocî vat : „Ma na aşme nê karî keme, fêlan aşme nê karî keme… peyco ame naca, ma qese kerd. Ma vat, beno ke ma gorê rêza programe kar nêkerd, qey ma ver ba însanan xo rîsîya vecîme. Coka ma munasib nêdî. Na sire de projeya ma ya neweye, vaya Hazir Babaya. Ma ke na vaye vecime, bîyame, ma ra kêfweş kes êndî çîn o. Ju kî ma wazeme hetê gole de cayê silandî radîme û silandê binê raya Keça kî tayêdee bîn hîrakerîme. Na saate kar û gureyê ma na wo.

W. Gestemerde: Nawo bî di-hîre serî, ke ju projeya „Bonê Dewe“ ra êno qesekerdene, lê çi hêf ke hona çîye werte de çîn o. Şima derheqê na proja de wertê xo de qerarê gureto û çi taw, kotî, se û kam virazeno? Ê dideyine, Fikretê lacê Apê Îlhanî vat, wazeno bi nameyê pîyê xo na proja virazo. Na mesela çiqas raşt a û derheqê na proja de ti şîkîna ma tayê haydar bikerê?

M. Ali Kocadağ: Hêya, nika nîyete cîranan pêroyine a bîye ke, wertê dewe de ca bîvînîme û virazîme. Nika ke zê Bonê Weşîye (saglik ocagi) ke dewe ra durî virazenê, beno xirabe. Nika ma kî vame, eke Bonê Serweşîye (tazîye evî) wertê dewe de virazê, mordem bawerîya xo, veyveyê xo, şahîya xo… şîkîno rehet bikerone. Ê nika kî vanê wertê dewe de çale esta (Çala Wele). Çê Apê Hesenî kî vanê: „Çala wele tapîye ma der ra.“ Çîranî kî, tayên xo vanê: Tapîyê înan de nîya.“ Tabî ma rind nêzame. Ma çand rêyî seba Çala Wele şîme leweyê Enverî, ma vat: „Bê na çale baxişê dewe bike. Fikret kî wazeno bi nameyê pîyê xo Îlhan Mirzaoğlu bom bivirazo. Hardî kî bi nameyê M. Sidik Kocadağ bo.

W. Gestemerde: Şima no derheq de Fîkretî de qese kerd? Nêvano çi? Vat ke ez na projeya Bonê Dewe cêna xo ser û virazena?

M. Ali Kocadag: Ma emser têy qese nêkerd. Naye ra ravê qese kerdo. Tawo ke şîyê Hazir Babayî ser, Wusên Xoce bîyo, Alî Xoce û Alî Beg bîyo, ûca Hazir Babayî ser ro kelê xo birno Fikretî vato: “Şima ke mi rê zereyê dewe de cayêde munasîb bîvînê, ez ju Banê Serweşîye (taziye evi) virazena. Ser ro kî nameyê pîyê xo nivisnena.” Ma kî seba Çala Wele şîme lêweyê Enverî. Enverî kî çîyê nêvat. Xanima dê Aytene vat: „Eke hardê ma wo, ma nêdame. Eke ê dew o kî wa xorê virazo.“

W.Gestemerde: Seba ke na mesela hal bibo, şima nêşîkînê Fenmemurî bîyarenê?

M. Ali Kocadag: Nika Wusêno bira, ma serena (2010) dewe de ju kombîyayîşêde (toplanti) zaf hîra keme. Nê kombîyayîş de ke cîranan çi qerar da ci, ma kî gorê qerarê cîranan raye ra şome.

W.Gestemerde: O taw ma na mesela (çala wele) tîya de kîpkeme.

W. Gestemerde: Amanca Çobondaği (Gestemerde) Köyü Kalkindirma ve Güzelleştirme Derneği ju kî: der-dorê dewe de, dar û ber ronayene bîye. Se ke şima kî zanenê dewa ma laserî verde ya. Şima şîkînê her sere cayê dar-ber ronê? Yan kî ê ver û viradanê dewe ra mordem nêşîkîno balîyan hardkero, daro mamûx, şîlan, benav… rono?

M. Ali Kocadağ: Emser, ez û Rizayî rêye-di rey şîme û bê naye kî mi dîlekça dê Orman Çevre Bölge Müdürlügü. Wusên Xocî kî vat: „ju dîlekçe kî bidenê Muş Ilçe Müdürlügü. Nina kî ju ekîb rûşnabî dewe. Ninan kî „No karê ma nîyo“ vat û şîyî. Rêyêna Orman Çevre Bölge Müdürlügü ra pîyayê ame dewe û darê ke ma wertê mezelan de nayîbî ro, ê darî dî û zaf bi ci qayîl bî. Xora a roce kî xêrê Qemerê Apê Îsmaîlî denê. Mêrik amê bi ciranan nîşt ro û non-monî kî werd. Tumê Mezelan ra qaytê ê ver û viradanê dewe bî, vat: „Şima dîlekça xo bidê zere, muhendizê ma êne, û eke înan onay da ci hona. Ma nê kar û gureyî ser ro vindeme. Wa xezîla ke waxt û îmkanê ma bîbîyene, ma bi xo no karê xo bikerdenê. Ez her tim pê nê kar û projayanê xo der a. Heyanî ke îmkanê mi bî, heyanî ke mi dest ra amê, ez pêşê nê karî ranêvirdana. Feqet her çî kî zê waştena mordemî raye ra nêşono.

Wusênê Gestemerde: Beno ke dewlete qanûnê (yasa) vet seba peyserdayena nameyanê dewan. Gelo şima şîkînê derheqê nameyê dewa ma (Gestemerde) de rêye bi dîlekçe muracatê ju dezgehî (kurum) bikerê û vacê: „Ma nameyê dewa xo Gestemerde peyser wazeme.“ Hela çi cewab danê?

M. Ali Kocadağ: Ule to ke raşte pers kena, ez ne nameyê Gestemerde ra, ne kî nameyê Çobandagi ra zereweş nîya.

W.Gestemerde: Qey? No nameyê Gestemerde, ma rê bav û kalê ma ra mendo.

M. Ali Kocadağ: Hela vinde Wusêno bira, to rê ju mesela qese bikerî. Ez tawo ke Izmir de nêweşxane de bîya, di pîyayî munebetî amayî lêweyê mi, vat: „Dewa şima de çand hebî merdê?“ Mi kî vat herhalde dewe de milet merdo çik o. Ê vanê belko miletê dewa ma vêşanîye dest merdo. Na merdbune waxtê ver de feqîrîye, hesîrîye û herb bîyo. Kalikanê ma, pîyanê ma kî sacîye teber ra na ser, mileto ke amo-şîyo non poto, do nînan. Na merdbune ûca ra menda. Ê mordem nika nêşkîno bi însanan bido bawerkerdene. Ez kî terefdar a. Bizanî ke çîyêde nîyanen esto, ez bi xo dîlekçe bena dana mehkeme, namryê dewa ma Gestemerde, pey de wazene. Xebera mi kî xora çîyê nîyanenî ra bîye.

W. Gestemerde: Çî-mî yo ke bav û kalê ma ra, dayik û pîrîkanê ma ra mendo, şima şîkînê nê çî-mî pêro aredênê û cayê zê muze de bişeveknê? Çunke no çî-mî hînî ver û viradan ra wo. Tayê çî nayê ver bi çiman. Ewro areyê dewa ma qey xan û xirabe bîyêne. Ma vacîme çî-mîyo ke muze de biêro şeveknayene: Dinge, Dingore, Destarî, Xize, Keware, Mişone, Cite, Sak, Erebanê gayan, Xizag, Tawig, Tirpane, Vaşturîye, Qirime, Hors, Dirmixe, Banoke… ûêb.

M. Ali Kocadağ: Hêya, raşt a. Tayê çî ma dest de esto. Erebane estê, pirocînî estê, galê beno, cacimî benê resenê benê… nê waxtê verî de kalikanê ma bi nînan kar kerdo û geçîme (debere) xo kerdo. Nika no çî-mî zê tarîxî eserî yo. Wa xezîla ke şima naye ra ver bîyardênê ma vîrî. Çunke ma zaf çîyî kerdî vîndî.

W. Gestemerde: Xora xuya ma kî, eke beno vîndî hona ma kume ra dime.

M. Ali Kocadağ: Ma ke wax ra aredenê, ju çê kerdenê pir. Ewro ra têpîya, çi kewt ma dest dame are. Cacimî benê, doşirmê benê, qab-qacax, cil-cor se ke ti nêvana distarîyanonî, hela destarîyanonî zaf muhima ma cîrana ra vame wa naye ra tepîya arêde.

W. Gestemerde: Gorê vatenanê şima nezdîyê disê (200) endamê (üye) komele estê. Nê endamî Çob-Der rê çiqas wayîr vecîne, û detsmijê (ucret) endamîya xo waxt ra danê? Yan kî kesên ke îdarê komele (Yönetim Kurulu) der ê, nê îdarekerî gelo çiqas xebatê komele ra xeberdar ê, û xebera xo jubînî ra esta, yan kî çîn a?

M. Ali Kocadağ: Sedûnewaûşeş (196) endamê komele estê. Dewe ra ma çar mordemî (Ez, Hemed, Cafer û Mehemedê Alxan) îdarê komele der îme. Ez karê komele na saate raye ra bena. Emser heq cira razî bo, domanê ma yê Almanya herkesî heqa xo ya endamîyenî dayîbî Îmamî, ma rê rûşnayîbî. Hata di meqbûzî kî naye mi de mendê, înan kî şima re Elîye ma de rûşnena. Ez karê komele hondayê nê hevalanê ma yê dewe ser ro nêverdana. Îstanbul de kî Wusên Xoce raştî kî merik xebetîno. Heq cira razî bo. Feqet çîyo ke esto, Îzmirê ma zaf gevşek o. Pîyayê ke îdarê komele der ê, hondayê têkîlîya xo bi cîrananê ma cîn a, destekê xo çîn o. Gere destek bidê ma.

W. Gestemerde: Ez bawer kena serêna amnanî kongreya Çob-Derî virazîna. Ti wazena serêna îdarê komele de rêyêna ca bicêrê?

M. Ali Kocadağ: Ûllahî hela qaytkeme. Hona çîyê kifşe nîyo. Nika ra nêşîkîna çîyê vacî. Heyanî o taw hela se beno. Belko tayê hevalî tayêna rind fikirinê. Nika îhtîyacîya ma wo fikrê rindî esta, pêro ez, ez nêbeno. Mordem ke bi rindîye munaqaşe bikerone, ju noxta de êno pêser û çîyêde rind vecîno werte.

W. Gestemerde: Komîta Gestemerdijanê Berlinî, wazena ke serêna amnanî (2010)Gestemerdijî pêro-pîya (qic ra pîl) dewe de pêresonê. Seba çîyêde nîyanênî komele şikîna organîzeya nê karî bicêro xo ser, û ju programe hazir bikeronê?

M. Ali Kocadağ: Ma destegê şima pêroyîne wazeme. Ma tenya xoser nêşîkîme.

W. Gestemerde: Bêguman na projeyêde zaf hîra û girs a. Gere ke herkes xo het ra destek bido. Ebi ju-di pîyan no kar raye ra nêşono. Gere destekê dewijanê ma yê Izmirî, Istanbulî, Yalova, Dewe, Ingiltere, Almanya… bibo ke wa no kar raye ra şoro.

M. Ali Kocadağ: Ez kî hetê çîyede nîyanenî der a. Hevalanê xo de kî qese kena. Hevalanê xo yê Istanbulî, Izmirî, Yalova û dewe de qese kena. Çunke emeg û kedm înan kî komele de zaf o. Ez xoser teyna nêşîkîna qerar cidî. Feqet ez bi xo terefdarê çîyêde nîyanênî ya.

O wo dewan bikero..