Gestemerde Online

Dosya Mûxtarîye

Herçî ra ravê, ez wazena derheqê Nazim Kocadağ (mûxtar o kan) de çîyê vacî. Nê mûxtarê ma kî qasê hêz û qeweta xo seba dewe xizmete û fedakarîye kerde û cîranan de birindîye derbaz kerd. Seba na xizmeta xo, wa weşûwar bo.

Ap Mehemed, ez to rê kî sere de kar û gureyê mûxtarîyenî de serkewtene û canweşîya to wazena. To emser aşma nîsane de morê mûxtarîye rêya diyîne guret xodest.

Naye ra çand serî ravê, ponc (5) serî mûxtar bîya û o taw kî, to qasê qeweta xo gorê şertanê o waxtî dewe rê xizmete kerde. Ewro kî ebe ê tecrubeyê xo rêyêna mûxtar a. No sebeb ra kî, mi waşt ke derheqê dewe û kar û gureyê mûxtarîye ser ro tayê mûcil bîmê û tayê persên mi kî estê, wazena înan kî to ra pers bikerî.

W. Gestemerde: Ti derheqê dewe de çi fikirîna? Têkîlîya cîrananê ma jubînî de senen a û têkîlîya Gestemerde û dewanê dormeyî (Kovike, Keça, Qeracêrê, Goşkar, Xelefan..) çi hal der a?

M. Ali Kocadağ: Têkîlîya ma wo dewanê dormeyî: Kovike, Keça, Qeracêrê, Goşkar, Xelefan, Zaçêx, Tacîye… zaf rind a na saate. Ma mûxtarê Kovike de qese kerd. Ez ravê ê Kovike vacî. Sindorê ma bi Kovike ra juy o. Gere ma gumanê xo bi jubînî bîyame. Çunke mal-dawarê ma têmîyan der o, awê ma têmîyan der ê, rayê ma têmîyan der ê, gola ma têmîyan der a … no sebeb ra kî ma gere gumanê xo bi jubînî bîyarîme. Gere ma jubînî de xayîntîye mekerîme, karê ke keme jubînî ra perskerîme. Birayê xo ra vacî, gere Xelefan kî hînî bone. Bi Keça kî xora probleme ma çîn o. Jubînî ra hes keme. Lê Xelefan, Taçîye û Zaçêx nê dewî awa çundanê Derê Soyî wazenê. Emser ke kombîyayîşê mûxtarê dewanê Gimgimî ke bî, Köy Hîzmetler Müdürlügü va: „ma emser awa Xelefan, Taçîye û Zaçêxî ame.“ Nika ê mordemeka gere bîşîyenê Goşkar ra "Awa Sipîye" bîyardenê. Peyco qeymeqamî, „nê karî bide vindarnayene ûca sentralê elektrîkî êno viraştene“ vat bî. Goşkarî kî gere emser seba arazîyanê xo na Awa Sipîye biyardêne. Hatanî înan xeta awe dabî kinitene, ard bî. No karê înan kî walî emir kerd û bi eskerî da vindarnayene. Wertê ma û dewan rind o, lê Xelefan seba awe ma ra miradîyê.

W. Gestemerde: Şima mûxtarê der û dorê dewa ma geganê êne pêser û problemanê xo caran jubînî de qese kenê?

M. Ali Kocadağ: Di rêyî keşif şîbî ko, ma ûca qese kerd. No keşif seba awa Derê Soyî amêbî. Ma, Kovike, Qilçixe û Gulike bi ju dîlekçe muracat kerd ke, nê awa ma ke ma dest bêrê guretene… pêyco ma wa ma rê dewlete cayê temîn bikero, ma keme bar, şome. Eke a dîlekçe kewte înan dest, înan no keşif da vindarnayene. Ma poncmîna mûxtarî (Ma, Kovike, Xelefan, Zaçêx û Tacîye) keşifê diyîne de Waranê Çelkerî de reştîme pê û xêle qese kerd.

Ha, wertê ma û cîranan jubînî de rind o. Na derheqê mûxterîye de şikîyene esta, esta kî. Na şîkîyene kî bê mana ya. Ewro ez biya mûxtar, mêşte juyo bîn beno. Gere mordem çîyanê nîyanena normal bîvîno. Herçiqas ke zê verocoyî mebo kî, tabî tayê miradayîş û dej esto. Nika kî herkes kar û gurêye xo der o. Ewro ez a, mêşte juyode bîn o. Gere mordem destek bidêro jubînî.

W. Gestemerde: Ti bi tayê projayanê xo vecîya raye û şeş aşmî yo ke ti mûxtar a, û wertê nê şeş aşman de seba Gestemerde û Gestemerdijan çi xizmete yan kî çi kar û gure kerd?

M. Ali Kocadağ: Hona mi qet kar û gure nêkerdo. Nika plan û programê xo to rê rêyena biwanî:

Ez, pê nê plan û projanê xo der a. Lê pêşê nînan kî ranêverdana. Mesela mi proja juyîne de vato: "Vaya Hazir Babayî veceme, ame"

Cîranê ke durimê xo hondê rind nîyo, înan tespît kena û dewlete ra cirê sosyalyardim wazena.

Nika ma nawo dest bi vaya Hazir Babayi kerdo, û xêrîye ser veceme.

Ewro (20.09.09) ez dewe ra çê bi çê cêra, û mi cîranê ma yê ke motacê yardimî yê, lîsta înan vete. Dewa ma ra, mi des (10) xanê liste de, namê înan nivisno. Gere nê cîranê ma bi xo şorenê Sosyal Yardimlaşma Kurumu de form pirkerê, bidêrê zere. Ê kî ênê dewe de rewşa înan tespît kene û hona yardim (yarmetîye) danê ci.

W. Gestemerde: Dewa ma (Gestemerde) ke dewa birî ya, wayîrê senê heqan a, û şima nê heqan ra çiqas îstîfade kenê?

M. Ali Kocadağ: Ez nawo çand rêyo şona Muş. Naye ra di rojî ravê (18.09.09) ez şîya “Orman Bölge Müdürlügü” mi vat:”mudirê mi, nawo payîz ame, verba vare şome dewijê ma maxdurê. Ê tayine ne mal o, ne dewarê xuyo nê dewîjê ma çi wele bi xora kerê? Ar-duyê nê feqîran ke çînê bo, mecbur şonê birê dewe birnenê anê fînê ta.” Pêco mudirî va:”dîlekçe bidê Qaymaqamî, feqet çand xanê dewe de manenê lista namanê înan vece bere bide Qaymaqamî, ma kî ci ra dexalet (rica) keme wa belko komir bido şima.” Nika mi kî a dîlekçe nivisna kerda hazir. Ewro (20.09.09) dewe ra çê bi çê cêra nameyê sermîyananê çêyî ju bi ju nivisna û dayî îmza kerdene. Endî na Roşana Remezanî ra dime bena dana Qaymaqamî. Amancê ma kî o wo ke, ma nê ardimê komirî bicerîme.

W. Gestemerde: Bê komirî, zobîna wayîrê senê heqanê?

M. Ali Kocadağ: Xêca komir ra zobîn çîye çîn o.

W. Gestemerde: (no are de qesekerdena mûxtarî, elektrîkê dewe ser o dewam kerde û mi kî nêwaşt qesekerdena êy bibirnî coka mi persa xo pers nêkerde.)

M. Ali Kocadağ: Proja mina çarîne, derheqê elektrîkê dewe de bîye. Mi derheqê elektrîkê dewe de, qatîye ci bê dilekçe xo nivisna da “Telaş” hem îta Gimgim de hem kî Muş de. Elektrîkê dewe hawtaûhêşt (1978) de ke amo, hawo bî çand serî ke qet onarim nêkerdo. Saatê rêy elektrîkê dewe birîno. Ê kî vanê “ödenek çîn o. dewlete ke ma rê ödenek ruşna, ma kî dewan cême rêze û dest bi onarimê elektrîkî keme.” Xora ke emser ame viraştene, ame viraştene eke nîyame viraştene kî rêna şona wa belko bicêre rêze û wa serna (2010) virazê. Trafoyê elektrîkê dewe endî bîyo xirabe. Ma wazeme nê trafoyê elektrîkî bîyame wertê dewe de virazîme.

W. Gestemerde: Proja daristanî (proja mezelan) endî ma şîkîme vacîmê temama yan kî hona kêmasîya xo esta? Gere kemer û kûçê wertê mezelan bîyamenê weçîntene, Hênî bîyamênê viraştene, der-dorê mezelan de dar û ber bîyamênê ronitene û nayê ra tepîya kî gere mezelî ju hîza de bêrenê kinitene. Ê di-dinê şima emser wertê mezelan de çiqas fîdanî nayî ro û nê fîdanî nika bîye kewe?

M. Ali Kocadağ: Gorê mi hama-hama endî temama. Çîyo ke esto kewrayê ma Wusên yanî Tekîn vano: "çêberê daristanî bivirnê bîyarenê hetê serî (hetê çê Apê Îsmaîlî) de ju çêberê de bîn virazê û wa milet cêr o payna mezelan nêdo û nêşorone cor." Mi ra gore kî, çêberê di-dîne îcab nêkeno. Kemer-kuç o ke ma na wusarî wertê mezelan ra veto û do are, hona hênî vineto. Ma roce ê kemer û kuçî veceme û şaneme hete. Naye ra têpîya kam ke mezlê xo day viraştene gere der-dorê mezela xo pak kerone û çîye nêvirdo. Şima vanê “naye ra tepîya mezelî bi rêze berenê kinitene” lê cîranî hênî nêwazenê. Dar-berî kî ma emser darê akasya û darê gozî nayro. 120-130 fîdane ma der-dorê mezelan de naro. Nê darî bîye kewe û zaf bîye rind. Der-dorê mezelan zaf bîyo rind. Emegê ma kî ê şima kî zayê nêşîyo.

W. Gestemerde: Tayê dewîjê ma wazenê dewe de xo rê bona virazê, lê hardê xo dewe çîn o. Ma şima seba nê cîranan çi fikirînê? Gelo mumkun nîyo ke şima seba nê cîranan mere dewe de cayê bonan parsel kerênê?

M. Ali Kocadağ: Heya, nika emser lacê Hesenê Apê Cibraîlî Bira cayê hardê bonanê xo esto, arazîye xo, axpînê xo esto, ame va: "lêwe gomê çê Apê Kîyayî de ca biderê mi ez xore bona virazî." Ma kî va: "ma hard nêdame, ca wo ke ti wazena bona virazê merê dewe o. Ê di-dîne xeta borîyanê awa dewe o binera ena ûca nêbeno." Ha, waxto ke cîranan qerar daci va: "wa xo re virazo" ez kî tabîye ciranan a. Ez ke vacî seba bona ca dame fêlan kesî û bêvan kesî nêbeno. Tabî ke pêro cîranê mayê. Eke bibo Beja de mordem şîkîno cayê parsel kerone seba bona rindo. No kî ancax bi qerarê cîranan, bi qerarê hetê dewe mumkuno. Xêlê cîranê ma wazenê dewe de bona virazê. Lê caye de hênî munasib çîn o.

W. Gestemerde: Gere Nazim û cîranan ra pîya, tapuyê bonanê çê Apê Îsmaîlan cire bivetênê û cidenê. Gelo xebera to nayê ra esta?

M. Ali Kocadağ: Nika newe ra (tezde) ju yasa vecîya û a yasa kî nawa mi de. Bayindirlik î ma re ruşna. Bonê ke bê xeber e (qaçax) amê viraştene gere ma rapora înan vecîme û bidîme Bayindirlik. Waxto ke mordem cinêdo kî problem vecenê. Na yasa de amo kifşe kerdene ke; hardê daristanî (hardê mezelan) caran nêno rotene. Ha, mere dewe bo beno. Nê bonê çê Apê Îsmaîlan kî tapuyê mezelan derê. Naye ra ravê dewe de kombîyayîşê (toplanti) de hîra bî. Mi uca na mesela arde raye. Mi va: "no karê kalkanê ma bî. Gere înan waxt ra ca bidenê ci. Çunke nê mordemekan merdena me de, cematê ma de, veyvê ma de yanî roca rinde û xirabe de hertim ma pîya bîme. Înan ke ca nêdo ci gere ma ciderîme." Raştî kî heyanî nika ma vatê belko cayê nê bonanê çê Apê Îsmaîlan hardê Îbrahîm (çê Selîm Axayî) yo. Pêco Fenmemurî ke ame va: "cayê nê bonan tapuyê mezelan der o û alaqa xo bi milkê Îbrahîmî çîn a."rêna kî xo re şîkînê bona virazê. Kesî cira çîye nêvato û nêvano kî. Ê kî can-cîgera mayê û cîranê mayê.

W. Gestemerde: Tapu kadast ro kamcîn sere kewt dewe û o sirê de muxtar kam bî?

M. Ali Kocadağ: Ser ra hazarûnewseûhawtaûşeş (1976) de Tapu Kadastro kewt dewe. O sire de mûxtar: Wusênê Apê Hesenî bî.

W. Gestemerde: Naye ra çand serî ravê ray û rêçanê zere dewe ra mal, dawar, erebanê gayan û heyanî otomofîle kî rehet amênê û şîyenê. Ewro kî nê ray û rêçan ra cavirdîme însanan, pisinge derbaznêbena. Yanî herkesî xo hetê ra ray û dirbê zere dewe ya kerde teng, yakî kerdê kîp. Projayanê to ra juye kî nê kar û gureyî ser o bîye. Ma şima naye ser o dewijan de qet qese kerd?

M. Ali Kocadağ: Ma no derheq de cîranan de hona çîye qese nêkerd o. Ma şîkîme ray û rêçanê dewe tespît kerîme, lê ma nêşkîme dês û duwaranê kesî birijnîme. Mesela ez vacî Mehemedî hardê raye gureto û dêsê xo raye ser viraşto. Ez nêşkîna nê dêsî birijnî. Lê gere ke ez xeta xo bizanî ke mi hardê raye gureto. Emser raya wertê axpînê çê Apê Alabasan û çê Nîyazîyê Apê Welî de traktorê vaşî kewt ra dêsî, dês rijna. Raya tumê mezelan zaf kerda teng. Raya zere dewe, wertê axpînanê çê Apê Kerîman û çê Apê Seferan ra bice hêyanî Çirtika Meyre raya dewe zaf teng a. No karî kî qeweta ma ra teber o.

W. Gestemerde: Gelo na gola dewa ma ra axir ke kesî cira xêrê nêdî. Mordem ke mosa berzo gole, gelo mosê enê? Rêyê wertê miletê ma de amê qesekerdene ke Beledîya Gimgimî wazena na awa gola dewa ma ra îstîfade bikero. Ma na ciqas raşt a?

M. Ali Kocadağ: Mi emser keşifê koyî de mûxtarê Kovike ra, ê Xelefan ra û ê Zaçêx ra vat: "şima gere ma rê mînetdar bê, ke şima awa gola dewa ma ra îstîfade kenê. Na awa gola dewa ma ke çînebîyene Kovike şima se kerdê? Zaçêx, Xelefan Derê Gindalîye bi awa gola dewa ma gime-gima xo ya. Gere şima vacê Gestemerde heq şima ra razî bo. Cor Heq, cêrî kî na awa şima ra fayde vînenîme û şima rê sipas keme. Şima bi naye kî nêvindenê ewro vaştê ra awa Derê Soyî wazenê." Mi ke na vatena xo vate ûca, Köy Hizmetler Müdürî kî, „vicdanê mi ra ke mordemek raşt vano.“ Vat. Naye ra ravê kî Serekê Beledîya Gimgimî Demîr çand rêyî amêbî. Kombîyayîşê mûxtaran de na qesa arde raye. Demîrî, muxtarê Kovike ra vat: "şima awa Gola Sare dê Gimgimî ewro kî, bê awe mende û awe cêrene." Çand rêyî kî teklîfê dewa ma kerd, vat: "şima ke wazenê ma na awa gola dewa şima bîyame Gimgim." Raştî kî awe Gimgimî çîn ê. Beno ke meşte bîro şorêne awanê ma yê koyî berenê. Çunke yetkîye xo esto. No sebeb ra kî gere ma awanê xo rê wayîr vecîme. Nika na gola dewa ma, ma rê fayde xo qet çîn o. lê mordem nêzano demê amayene de se beno. Şoronê hînî vindo. Gola dewama de ke bêrenê mosêye sazanî ênê. O kî gole bîya pirê kevzî û çamûre. Vero coy nêbîye ke awa gole, zê şara şitî bîye. Ma û Kovike emser bi dîlekçe muracatê qaymaqamî kerd ke, wa virîndîya na awe radîyo, ke wa awe der bo, şoro. Gere no pirdê wertê ma û Kovike teze de bêrone viraştene. Çunke der-dorê gole zaferî bîyo heze û hem milkê dewa ma, hem kî milkê Kovike zaferî binê awe de mendo.

W. Gestemerde: Dewa ma de nika çand xanê mendê?

M. Ali Kocadağ: Na zimistanî bawer bike da-vîste xana manena. Mi seba yardimê komirî hîris xana nivisna bî, lê nînan ra des xanê şonê.

W. Gestemerde: To na zimistanî dewe de manena yan kî şona Izmir?

 M. Ali Kocadağ: Mi xo rê ar-du gureto û ez dewe de manena. Beno ke aşme şorîne lêwe çêna xo. Yanî ez dewe de manena.

W. Gestemerde: Persê mi honde bî. Beno ke mi tayê çî xo vîrî ra kerdê, pers nêkerdê, yan kî çîyo ke ti wazena vacê esto?

M. Ali Kocadağ: Ê mi kî honde bî. Lê ez naye vacî, tawo ke ez şîya weçîntîşê mûxtarîye, bi desûhîre (13) projayanê xo kewta raye. Ez rêyêna kî vana hondawo ke mi dest amê, pê nê projayanê xo der a. Ju kî xêrê xo ma rê dûa bikerê. A nê xas û gerçegê Heqî kî wa şima de bê. Hazir Baba, Goşkar Baba çetine bi şima nêdo.

W. Gestemerde: O taw ez na persa xo nîya pers bikerî. Vatena to cîrananê ma yê Avrupa rê, ê Îstanbul rê, ê Îzmîr rê, ê Yalova rê, ê dewe rê… çik a?

M. Ali Kocadağ: Nika vatena mi çik a? Ma, na komele arda werte û eke na komele nîya bimano seba dewe zaf rind a. Mesela sîta dewe (Gestemerde Online) esta. Mordem bi vesîla na sîta heşarê jubînîyo û jubînî ra xeberdar o. Mordem ke jubînî ra ke xeberdar bî, jubîyena ma kî hîna bena qewîme. Êno na mana ke jubîyena ma hona lingan sera ya. Gumanê xo bi jubînî bîyarenê. Çimê şima jubînî ser ro bo. Jubîyena xo û îtîbarê xo merijnê, jubînî rê destek vecîyê. Silamê mi cîrananê ma pêroyîne ra vacê …

W. Gestemerde: Ez zaf bîyane şad ke to waxtê xo da û mi de no sohbet kerd. Weşûwar bê. Xizir canweşîye û saata weşe bido. Ez hînî bawer  kena ke, to bi destegê Gestemerdijan heqa nê kar û gureyî de êna.

Qedîya