Naye ra çand rojî ravêr mi seba sînevîzyonê filmê Gestemerde, arşîvê apê xo (Alî Babaoglu) ra çand kasetî ardî û dayî kopîkerdene. Apê mi nê kasetî  seranê 1987 de ont bî. Mi nê kasetî ardî çê û bi merex û heyecan qatîye ci bîmê. Yanî kasetê ke naye ra vistûhîre (23) serî ravê ame antene ê kasetî.

Sera 1987 de ke apê mi êy şîye Hazir Babayî ser, uca ra kî şîye waranê dewe.  O taw cênî berîya malî de onte. Feqîrîye û hêsîrîya dînya hete ra, bîrîye û hesreta xerîbîye kî hetê ra vîlê miletî kerd o çêwt. Kam ke amo verê qamera lorike da piro û berbo. Miletê ma zaf feqîrîye dîye, zaf hêsîrîye dîye, zaf zahmetî dî. Coka miletê ma hondaye zere vêşaye û zere piro.

Kifşo ke ma kî endî zê domanê dergûşî zaf bîme zeretenik. Tivanê belko hêsîrê çimanê ma mana ser ro yê. Ax û waxa welatî zê kermê qota dare zere ma werd. Kamaxa xerîbîyê de bîme wayîrê derd û qotkan. Hesret û bîrîya welatî, hesret û bîrîya may û pî , hesret û bîrîya wa û birayan, hesret û bîrîya der û cîranî , hesret û bîrîya heval û hogirî… zere ma de zê andalê cilan bîye qat bi qat. Raştî kî gegane kamaxa xerîbîye, bi mordemî "heywax û hêyliminê dayê" dana vatene.  Xerîbîye ma ardîme halê de henen ke, ma welat ra fîştme dûrî. Se ke ma fîştme dûrî hênî kî ma ax û waxe de virdayme. Nafa kî her çî re berbeme, zîbeme, naleme, ax û wax keme lê o kî endî fayde nêkeno. Yanî na dînya fanîya. Kesî re nêmenda û kesî re kî nêmanena.

Qatîbenê wertê nê vistûhîre seran de kam ame kam şî? Lê wertê nê vistûhîre seran de kam ame ez nêzana, feqet kam şî ez rind zana. Wa Heq rama xo re ci şa kerone û hetê mi ra kî cayê pêroyîne cenet bone.  Her şîyayîşê ju gestemerdîjî ma de, ma kî tey merdîme. Dejê cîrananê xo, ma zê dejê xo zanit û cire berbayme. Mordem ke weşbuna xo de qedro qimetê jumînî bizano zaf rindo.

Na mana de gere ma gestemerdîjî pêro pîya reng û vengê Gestemerde re wayîr vecîme. No derheq de komela man a Çob-Der re û gestemerdijan re di pêşnîyazê (öneri) mi estê:

"Arşîvê Gestemerde" virazîme.

Bi namê "Reng û Vengê Gestemerde" sere de rêye kî ju kovare (dergi) vecîme. (no derheq de kî pêco fikrê xo nivisnena.)

Derheqê arşîv de kî bêguman ma her kes de taye çî est ê. Nê çîye ke ma dest de estê kî, gere ma nînan bişeveknîme û cayê nê cayê pêro pêresnîme û ju "Arşîvê Gestemerde" virazîme. Şima dest de ke, bantê qeseykerdene (kaset), mektubî, qasetê vîdeoyî, resimî, kitabî, belge ... ke estê nê arşîvê xo cayê de rind bişeveknê û berenê ma nê arşîvî cayê bîyame pêser.