Çi hêf ke şarê ma xo mîyan de bîyo lete lete. Gelê way û birayan, gelê dostan, gelê embazan, gelê miletê ma, gelê qomê ma … şima zanê, ma xo mîyan de bîme lete lete. Ma xo mîyan de bîme hurdî hurdî. Herkes gore kêfê xo çîye vano. Herkes gorê kêyfê xo meydan de cîrît kay keno. Herkes gorê kêfê xo cun vayîdano. Herkes ra vengê vecîno. Kirmanc, Zaza, Elewî-Qizilbaş, Kurd, Tirk û nêzana çi nîya devam keno. Na lete letebîyena ma û hurdî hurdîbîyena ma hona xêle sere ma dejnena. Belko na rewşe weşa tayine şona, lê weşa ma qet nêşona. No kî dişmenî şakerdene ra dot çîye nîyo.

Gelo şarê ma qey xo mîyan de bîyo lete lete?

Raştî kî na meseleyêde pêgoşîeştene nîya. Na meselêde zaf muhim a. Ma ke na mesela ser ro mevindîme, zaf zerar dana ma. Her çiqas ke tayê kesî naye ra zewq cênê û kêfweş benê kî, gere ma fersend medîme nê pîya. Nê fîtne û fesadîye kenê wertê miletê ma û ma cêser fînê. Ma heyanî ke nê meseleyê xo, xo mîyan de hal nêkerdî, ma kî game bi game peyser şome. Bi no usil, bi no qeyde game ravêrîşîyena ma kî mumkine nîya. Mi ra gore na rewşe qet rind nîyasena. Hona ke rew o, gere na mesela ser ro bêro vindetene. Şar şî aşme ame, ma kî dormê xo de kewtîme bi gujike eme-şome, hona ju meselêyede xo ya muhime hal nêkerda. Ez bawer kena serê hardanê na dinya ra şarê ma ra feqîr, şarê ma ra hêsîr, şarê ma ra belengaz ... kes çîn o. Yanê  xêca şarê ma ra, ê kesî problemêde xo yo nîyanên çîn o. Xêca şarê ma ra kes bindest nîyo. Xêca şarê ma ra kes lete lete nêbîyo. Xêca şarê ma ra kes hurdî hurdî nêbîyo.

Çi hêf ke miletê ma ne dostê xo, ne k î dişmenê xo nas kerd. Eke nas bikerdenê ma kî ewro xo mîyan de nîya lete letenêbîyêne. Mordem ke dost û dişmenê xo nas nêkerd, xo qet tewr nas nêkeno. Ma ke dostê xo dişmenê xo rind nas bikerdêne bawer kena ke ma zaf meselê xo nika rewêna hal kerdbî.

Şar ke pêtkerdena jubîyena xo rê, kamîya xo rê, welatê xo rê, zon û kulturê xo rê xizmete keno û xebetîno, şarê ma kî çi hêf ke xo lete letekerdene rê xizmete keno. Na xizmeta ke  heyanî  nika  seba lete letekerdena ma ama kerdene, wa heyanî nika seba jubîyena şarê ma bîyamêne kerdene, wullahî nika welatê ma kî, zonê ma kî bîbî azad û meselê ma yê bînî kî nika rewêna çareser bîbî. Belko ewro şarê ma meseleyê xo hal kerdbî û cayêde zaf muhim de bî.

Qasê jubîyena şarê ma, qet çîyêde muhim çîn o. Heyanî ke şarê ma xo mîyan de ju nêbî, organîze nêbî raxelesbîyena ma kî çîn a. Timûtim bindestê dişmenî de qul û kolemendene rê mahkum maneme. Seba ke ma dişmenî rê qul-kole mebîme gere ma xo mîyan de haşt bîme û seba jubîyena xo xizmete bikerime.