Kongreya Çob-Derî ya diyîne (2. Çob-Der Olagan Kongresi) edi Gestemerde de (03.08.2010) ame viraştene. No sebeb ra kî ez sere de, emeg û keda kamî ke komela Çob-Derî de û na kongreya diyîne de vêrda ra înan re zaf sipas kena. Kongreya komela Çob-Derî ya diyîne  rind-xirab viraziye. Ma rê kî, kongreya komela Çob-Derî re firaznayene û cire serkewtene waştene kuna. Gestemerdijê ke îdarê Çob-Derî de ca gureto înan kî

Gestemerdijên hêcayî, wa û birayên delalî,

Qet bêguman se ke êno zanitene jubîyena gestemerdijan her çî ra ravêrî êna. Her çî ra muhum yanî dewe re kar û xizmetekerdene ra muhum, jubîyena gestemerdijan destan ser ro pêtpêgureten a. Jubîyena ma  hêz û qeweta ma wa. Jubîyena ma dewe rê wayîrvecîyen a. Jubîyena ma dewe rê xizmetekerden a. Jubîyena ma jubînî rê piştîdayen a û destekvecîyena. Jubîyena ma organîzebîyena ma wa. Ma ke naye nîya bizanîme o taw dewe rê her xizmete kî rehet êna kerdene. Ewro dewe rê xizmetekerdene hete de vindero, jubîyena ma, ma dest ra şîya. Serdinênî kewte werte cîranan.

Gelo ribalê rîye kamî ra û ribalê rîye çinayî ra na serdinênî kewte werte cîrananê ma ê dewe?

Na perse gere her gestemerdijî xo ra reyê pers kerone.

Ewro cîranê ma yê dewe qey jubînî ra durî remenê?

Qey na serdinênî kewte werte cîranan?

Eke heqa cîrantîye, heqêde giran a, cîranan de qey kayê di rîyênî eno kaykerdene?

Rîbalê riyê kamî ra?

Rîbalê rîye çinayî ra?

Sebebê naye çik o?

Ma gere nê persan ser ro vindêrîme.

Mi ra gore, rîbalê rîyê weçîntîşê muxtarîyênî ra. Ribalê rîye komela Çob-Derî ra. Rîbalê rîyê tayê dewijanê ma ra. Çi hêf ke ewro rîbalê rîye nê sebeban ra cîranê ma jubînî ra bîye serdin, jubînî ra şîkîye, jubînî ra dejayîyê, jubînî ra heredîyê, jubîyena xo ama weşanitene… No sebeb ra kî ma gestemerdijî gere destê xo vîcdanê xo sernîme û nê meselanê dewe bi rindîye hal bikerîme.

Îdarekeranê Çob-Derî rê rica û dexaletê mi a wa ke şima dest ra çiqas ke ame rindîye re bixebetîye. Îdarekerê komela Çob-Derî benê, muxtarê dewe beno, heyetê dewe beno, ciranê ma yên ke teberê dewe der ê, yanî cîranê ma yên ke xerîbîye der ê wa her gestemerdij yanî kam beno wa bibo, cara firqe wertê cîranan mekerê. Çob-Derî ke derheqê dewe de kar û xizmete kerde, ravêrî wa fikrê cîranan pêroyîne bêrone guretene. Gere gore vatene û fikrê cîranan raye ra şorenê. Henî bo ke wa kes kesî ra lomeyê xo mekero, kes kesî ra nêdejo, kes kesî ra nêmiradîyo. Yanî vatena mi a wa ke bi rindîye û bi fikrê cîrananguretene  her karê dewe hal beno. Bi sare ontene, bi cîranan jubînî ra durîfîştene, bi dirîyênî, bi nêheqenî kar û gureyê dewe hal nêbeno. Ma dewe de huzir wazeme. Ma rê xizmete kî lazime nîya, wa honde ke cîranan de bi rindîye bêro derbazkerdene. Juya ê diyîne kî gestemerdijê ke bi zere û canl, bi fedekarîyenî xizmete kenê, çi hêf ke qedr û qîmetê keda nê însanan kî nêna zanitene û no kî dej dano mordemî.

Na saate fikrê mi, waştena mi, rica û dexaletê mi û pêşnîyazê mi şima rê honde bî. Wa derheqê nê nusê mi de kes medejo. Ez bawer kena her kes fikre xo çerçeveyêde ahlaqî de vatene de kî serbest o. Bimanê weşîye de.

Wusênê Gestemerde