Se ke eno zanitene 12 yê eylule 2010 de Tirkîya seba qanunê bingehînî şona referandum.  Naye ser o hukumatê AKP kî qanunê 12 yê eylule rêyna pol ser ro polkeno û ano şaneno miletî ver. Qanûnê 12 yê eylule bi polkerdîş nêvirîno ra. No qilifê qanunê şima êndî helesîyo ro û pol nêceno. Şima kî zanê ke pol ser ro pol nêderzîno, o waxt qey xo xapnenê? Nika raştî kî her çî hete de nê qanunê Erdoganî ma re çi anê yan kî çi benê û şarê ma xo zerê nê qanunnan de vîneno yan kî nêvîneno? Seba ma pêroyîne na perse zaf muhuma.

Ma pêyser bême meseleya xoya muhume ser. Gelo hukumatê AKP nê qanûnê xo de çiqas ca do şarê ma? Hukumatê AKP tewr şarê ma nasnêkeno, êndî se qanun de ca dana miletê ma. Qanuno ke ca nêdo zonê mi, ca nêdo kûlturê mi, ca nêdo kamîya mi, ca nêdo bawerîya mi û qanunê ke heq, huquq, adalet, demokrasîye, serbestîye, haştîye û biratîye şarê ma re zêde dîye û  nê heqanê însanetîye ra ke mahrum virdayî gere miletê ma kî gore naye bilewîyo ra. Miletê ma rê ne "Nêy" (hayir), ne kî "Hêya" (evet) çîye ano. Ancax no qanun koke ra gere rind pak bo û qanuno newî bêrone viraştene. Firqa qanunê Kenan Paşayî û qanunê Erdoganî cêr-cor çîn a. Zê her waxtî rêyna ju milet, ju zon, ju bawerîye, … yanî şarê ma serê hard ra esto lê, heq, huquq û qanunan de ca guretene kî cire çîn a. Nê mordemekan kamîya ma re tahamul nêkenê, zonê ma re tahamul nêkenê, namanê ma re tahamul nêkenê, bawerîya ma re qet tewr tahamul nêkenê… na tahamul nêkerdena nînan ser ro, şarê ma kî ravazo qanunê nînan re "Hêya" (evet) vaco? Ê ma na bîyena?

Madem ke hênî ro,

Qey cemevî hona cayê îbadet kerdene re nîyame qebulkerdene?

Qey mekteban de hona bi zor dersa dînî danê domananê Qizilbaşan?

Qey zonê ma Kirmanckî (zazakî) nêno şinasnayene û mekteban de zonê perwerdekerdene nêkenê?

Qey kamîya ma nasnêkenê?

Qey namanê ma nê kanan pêyser nêdanê?

Qey bawerîya miletî ser ro êno qeseykerdene?

Qey vane "Tirkîya sed ra 99î muslimanê"?

Qey karkeran re, mazluman re, feqîran re hona heq, huquq û adalet çîn o?

…?

Nê qanunan de gere her miletî re, her kesî re juyane  ca bibîyêne. Yanî qanunê de demokratîk bîyene. Ju reng ra nêbîyêne, wa her reng ra bîyene ke wa her kesî xo te de bidîyene. Ê nika hukumatê AKP seba ke verê xo yado qanunê ke cire  engel fîne kar werte ra dardêwe. Gorê waştena xo, gorê kêyfê xo nê qanunan ser ro kay kaykerdo. Yanî hukumatê Erdoganî seba ke meydan de cîrît rehet kaybikero ca dano xo û raye dano xo.

Qet kes xo mexapno. Hênî aseno ke şarê ma re îmha û înkarkerdîş ra dot çîye çîn o. Yanî hetanî ke zîhnîyete 12 yê eylule bî, meselê şarê ma kî çareser nêbenê. Naye ra gore gere şarê ma kî seba ke meselê ma çareser bênê, wa êndî nê referandum de dersa zîhnîyetê 12 yê eylule cido.

Wusênê Gestemerde