Na derbe, derbêde xedare û derbêde girane bîye. Na derbe, derba dişmenê bêbextî bîye. Bîrîna na derbe jan dana û hem kî zaf xedar jan dana. Heya, tam hîrisûçar însanê bê suc û bê gûnayî, hîrisûçar însanê mahsûm û pakî, hîrisûçar însanê feqîr û jarî, hîrisûçar însanê sîvîlî, hîrisûçar însanê dewîjî, hîrîsûçar kurdî,

yanê hîrisûçar canî hem verê çimanê dînya de, hem kî verê çimanê ma pêroyîne de dewleta faşiste bi top û tifanganê xo dayî kiştene.

Gelo gûna nê hîrîsûçar însanan çik bîye?

Gelo gûna xo ju bîdon mazotardene bîye, gelo gûna xo ju pakete çayardene bîye, gelo gûna xo ju pakete cixareardene bîye, ya kî gûna xo letîkê non zav û zêçê xo rê, ma û pîye xo rê, wa û birayê xo rê, nêweş û seqetê xo rê ardene bîye?

Qet bê gûman ê bê suc û bê gûna, mahsûm û pak, feqîr û jarî bîyî. Ê hayrê verê dek û dolabanê Erdoğanî yê gonîwerî û Fetullahyê şimirî nêbî. Ê derdê feqîrîya xo de, derdê letikê nonê xo de bî.

Çi hêf ke ma nê qetlîamê Roboskî rê zaf bê veng mendîme. Gere qîrayîşê vengê ma ra herd û asmên bizingênê. Lê caverdîme zingîyena herd û asmênî, fekê ma ra ju çekûye nêvejîye. Gere ma duştê zulmkaran, bê bextan û xayinan de vengê xo, qeweta xo, hêza xo bikerîme ju. Lê çi hêf ke ma duştê zulmkaran, bê bextan û xayinan de ne vengê xo, ne qeweta xo, ne kî hêza xo u nêkenime û zaf bê veng manenîme. Coka ewro vampîrê gonîwerî bi gonîya feqîr û fiqareyî mird nêbenê. Coka ewro destê vampîran yaxe û pêsîrê ma der o.

Heyanî ke ma nîya bê veng mendîme, nê gonîwerî kî bi destanê xo yê gonin û qilêrinan, bi destanê xo yê pilarin û mirdaran pêsîrê ma nêverdanê ra.

Qaytê cibê, roj-mirojî însanî êne kiştene, roj-mirojî însanî enê guretene, hepisxaneyî bi însananê bê suc û bê gûnayan bîyê pir, û êndî hepisxanayan de ca, teber ra kî însanî nêmendê.

Bêrê, ma êndî dest û payanê nê gonîweran û qilerinan bişiknîme û pêsîrê xo ra warodîme. Bêrê, ma vengê xo, qeweta xo, hêza xo ju kerîme û lapaçêde rinde werteyê çimanê Erdoğanî de pirodîme û lapaçêde rinde kî berzîme re binê goşanê Fettulah Gülenî û Kîmyasal Necdetî ro. Nîya bo ke, wa bê bext û xayînî belko reyêna rixêde nîyanêne mewerê.

Nîyadê, gonîya mi de Selahattin Demîrtaşî ra bo. Mordemek tenya ke bi qesekerdena xo, verê fekê Erdoğanî de dano piro, kûl û bîrînê ma yê ke jandanê, ti vanê belko melem keno pira.

Hukmatê AKP ya faşîste ra gere hesabê qetlîamê Roboskî bêro perskerdene. Qaytê cibê, serê nê qetlîamî reyêna nîya bi uzr-muzran, nîya bi zûr-muranê Erdoğanî êno pêmitene. Gere nê zulmkarî, nê bê bextî, nê xayînî, nê faşîstî… hesabê qetlîamê Roboskî bidê.

Wusênê Gestemerde
Berlin, 17.01.12