Rayberê Kurdanê Dersîmî Sey Riza, sereroja 74. de edi Berlin, hîhata Cematê Dêrsîmî de roja şemîye (19.11.11) bi rîmet ame yadkerdene. Na roja yadkerdene hetê Cematê Dêrsîmî û hetê Komelê Elewîyanê Berlinî ra amebî organîzekerdene. Destpêkerdena programî de Pîr Seyîd Alî bi kilmek qesekerd û dûa wende. Na qesekerdena pîrî ra dime her kes qewxa Sey Rizayî ver de bî çewt û bi rîmet şehîdê na raye yad kerdî.

Sereroja şehîdbîyena Sey Rizayî ya 74. de kî pers û sûwalî bî rêze û ameyî. Ewro reyêna ame perskerdene ke "Qey hona Kûlê 74 Serî nîyamo têrapîştene? Qey cayê mezela Sey Rizayî înkar kenê û nêvanê?" çi hêf ke nê persî zê her waxtî bê cewab mendî. Hawtaûçar (74) seri yo ke kûl û birînê şarê ma yê Kirmancî nênê têrapîştene. Seba têrapîştena nê kûl û birînan kî Doğan Munzuroğlu tertelê Dêrsîmî ser ro ju fîlmê belgeyî kerd bî hazir.

Fîlmo belgeyîyo ke hetê rejîsorê kirmancî Doğan Munzuroğlu ra amebî antene "Kûlê 74 Serî", miletî bi dîqet û heyecan temaşe kerd. No fîlmo belgeyî hewtaûhîre deqîqe dewam kerd. Peynîya fîlmê belgeyî de, rejîsorê kirmancî Doğan Munzuroğlu derheqê filmê "Kûlê 74 Serî" de qese kerd û qesekerdena xo ra dime cewabê persanê miletî da.

Wusênê Gestemerde

Berlin, 20.11.11