Gestemerde Online

Emser kî hardî rewa, awan cemed guret.

Emser kî zimistan ame, vara verêne vare ko û tûman ser de.

Emser kî sere zê rojanê demê payîzî kilm, zê rojanê zimistanî kerheş û bê veng qedîye.

Êndî dest bi peysermordena rojanê peyena bî.

Saatan rojî, rojan hefteyî, hefteyan aşmî, aşman demî û deman sera de heqî dêm de.

Hîrisê û şeştûpanc rojê sera 2008 î, yane zê yew saate, zê yew roje, zê çimkîpkerdene û rakerdene, zê gijgeleka vayî, toz û wele ma ser vay dê û ame-şîye.

Sera 2008 î, ma ra zaf çî guretî.

Her çî hete de, ma yew serêde bîne bîme kal. Porê sare ma de çend têle bînî ya rişîyayî, ya kî bî sipî. Wa 4-5 têlî porrişîyene û sipebîyene de bimendenê tawa nêbîyenê.

Kam çi zano însanan bi sene xeyal û hêvîyan (omidan) dest bi sera 2008 î kerdbî.

Kam çi zano bi sene coş virana xo ser ra ard bî ra pê.

Her çiqas ke virana xo bi coş ser ra arde pê kî, tayîne re rind, tayîne re kî xirab ame. Merdim ke rindîye û xirabîye eştê têver bawer bike ke xirabîye emser rêyena hukim kerd.

Tayîne bi kêf û eşq dem û dewran ramit, tayîne kî binê top û tifengan de şîn û şîwan kerd.

Merdim ke zerê yew sîstemê nêweş û xerepîyayî de bî, ya şîn keno, ya kî şîwan keno.

No sîstemê Tirkîya kî zê pîyazê xerepîyayî xo de vêrdo. Sîsteme de nêweş o.

Tirkîya problemî çareser nêkerdene de zê her waxtî emser kî reyena cayê xo de mord û vinete.

Kêberê raya haştîye miletî ser ro kîp da ca û kilit kerd.

Destê ke xo dergê haştîye kerdî ya amayî şikitene, ya kî kelepçê dayî piro.

Qedir û qiymetê însanan nêzanitene de, heqê merdiman nêdayene de, însanan têduşt de nêguretene de, heq, huquq, adalet binê linganê xo guretene de, însanan re zulm û îşkenca kerdene de, asîmîle û înkar kerdene de… bawer bike ke dewlata Tirkîya ser ro yew dewlete de bîne çîna. Yanî na nêheqîyenî ser ro ke ewro dewletan mîyan de yew îstastîk ke bîyamênê viraştene, Tirkîya rêza yewîne de bê guman cayê xo guret bî.

Zulm û zordarîye, feqîrîye û hêsîrîye bîye zede, kemî nêbîye. Mabeynê feqîran û zengînan de qasê koyan ferqe esta. Her çiqas kî hukmatê Akp vaco “Ekonomî-Krîz çîn o„ kî nê ekonomî-krîzî miletî ra danê we û eşkera nêkenê. Bi kilmek Tirkîya de feqîrîye, belengazîye, bêkesîye, bindestîye, îmha û înkarkerdene sere xo gureto, şona. Kes naye înkar nêkerone.

Bîr û bawerîya mi a wa ke sera 2009 î, wa haştî û biratîye rê, demokrasî û azadîye rê wesîle bo.

Na mana de Tirkîya problemanê xo;

Bi herb nê, bi haştîye

Bi zordarîye nê, bi dîyalogî

Bi dişmentîye nê, bi dostenî

Bi qedexekerdene nê, bi azadîye

Bi çeteyan nê, bi demokrasî ganî çareser bikero.

Na mana de ez kî sera şima ya newîye zere û can ra fîraz kena, sera 2009 î şima rê, qomê ma rê, miletê bindestî rê,… haştî û azadîyêde bingehîne rê wa wesîle bo.

Heyanî sera newîye bimanê weşîye de…

Wusênê Gestemerde

Berli, 13.12.08