Gestemerde Online

TRT-Şeş vizerî (01.01.09) saate 19:00 de bi Kurmancî dest bi weşanê xo kerd. Koordînatörê TRT-6 î Sînan Îlhanî "ma ravêr bi ziwanê Kurmancî dest kerd bi ci û naye ra dime kî bi lehça ziwanê Zazakî û ê ziwananê bînan dewamkeme" vat bî yew qesekerdena xo de.

Merdim no derheq de nêzano vaca çi?

Ma ancîya kî vacîme "Ti xêr ama TRT-Şeş"

Her çiqas ke Erdoxanî bi şaştîye TRT-Şeş fîraz kerdî kî, gore mi na qimet û rumet ziwan nêdayena.Erdoxan vano "mi dersa xo rind wende şaştîye mi de çîna. Şaştîye ke esta medya der a." Mi bi xo kî goş naro vengûvajê TRT yî ser, raştî kî vatena Erdoxan ra çîye fam nêbeno. Erdoxanî vengûvaj de nîya vat "Ben TRT 6 hayırlı olsun dedim. Bunun kürtçesini bir daha söyleyim isterseniz, TRT Şeş Bi Hayr be." Na çekuye çîye îfade nêkena. Her hal de waşto vaco "Tu bi xêr hatî TRT-Şeş"

Hevîya ma kî aw a ke wa TRT-Şeş pirdê haştîye û biratîye bo.

Eke seba ziwan û kulturî raştî kî xizmete keno, ganî ravêr alfabeya kurdî nas bikerone.

Goreye alfabeya tirkî ke nivisna o taw na xizmete nîya, na raşta raşt dişmenti ya.

Ziwan zaf çîye de muhum o û bîngehê kamîya însanî yo. Koka ziwanî kî alfabe wa.

Na koke ser ro ajî bîye kewe, şima ravazê nê aja koke ra cirakere û teze de yew aje de bîne ronê nêbeno. Ganî ziwanzanayê ma derheqê ziwan de pîsîrê dezgehê TRT yî rameverdê. Koordînatörê TRT-Şeşî Sînan Îlhanî kî ganî no derheq de rind bifikirîyo û kesê ke ziwan rindzanê û wayîrê tercubeyê ravêr nînan tespît kerone. Imkanê dezgehê TRT yî estê. Destê xo reseno her ca. Şîkîne seba ziwanî, kulturî, domanan, muzik, sînema, edebîyat, weşîye û cuyane ser ro xizmetêde rinde bikerêne. Çike hêz û qeweta xo ca der a.

Ez bi xo çîye bawer nêkena çike zihnîyeto ke alfabeya ziwanê mi nas nêkerde û amancê xo ke çîyêde bîn o, o taw TRT-Şeş beno TRT Beş.

Dewleta Tirkîya îmha û înkarkerdîşî ra dime, qedexe û asîmîlekerdîşî ra dime na rêye kî wazena Kurdan bi nê qanalê TRT-Şeşî bixapno.

Çike verêi ma de weçîntîşê Beledîyan esto. No semed ra kî nînan bi zanitene no qanalê tv yî xo rê kerd ra. Akp na saate TRT-Şeşî seba ke propaganda xo ya weçîntîşê Beledîyan bikerone xebetneno aye ra dime kî propaganda xo asîmîlekerdene, înkarkerdene ser ro xebetneno. Mi ra gore yew kî çim boyax kerdene ra dot çîye nîyo. No tv yê Kurdan nîyo. Çike meşte hukumatê Akp vano: "gelê cîhanî ma tv yê Kurdan da ci" o taw Kurdî kî vanê: "gelê Cîhanî dewleta Tirkîya tv dama la belê ziwan û kultirê ma ra durîyo zere xo tip û tal o."

Madem ke şima wazenê yew qanalê Kurdan o resmî bibo, vinderê wa Kurdî bi xo nê karî bikerenê. Her çî gorê waştena şima nêbeno. Zîhnîyeto ke qedir û rumet nêda ziwan û kultirê mi, ziwanê mi qedexe kerd, herfanê alfabeya mi ra W, Q, X ke qedexe kerde, o taw ez kî qet tewr qimet nêdana TRT-Şeşî û ci wayir nêvecîna.

Bîr û bawerîya mi aw a ke TRT-Şeş wa TRT Beş nêbonê.

Wusênê Gestemerde

Berlin, 02.01.09