Rojeva Tirkîye ra PDF Yazdır e-Posta
Wusên tarafından yazıldı.   
Pazar, 18 Ocak 2009 20:58
Tirkîye de reqî û teqîya, gimî û zîngîya, tivanê belko hayleme û axîşer vaşto ra.

Rojeva (gündem) Tirkîya de nê rojan Çeta Ergenekonî, Weçîntîşê Beledîyan, Îsrail û Fîlîstînî û TRT-şeşî morê xo do rojeve ra. Ez kî wazena nê nustê xo de nê mewzîyan ser o kilmek taye çîyan binivisnî.

Çeta Ergenekonî

Ez bawer kena hawo bî gelê waxt ke ma bi Çeta Ergenekonî nîştîme ro û vaştîme ra. Şodir ma be xêr dî, şande ma be xêr dî. Her roje çîye vecîno mîyan. Çeta Ergenekonî, çiqas ke serê hard ra wa, honde kî bînê hardî dera. Dewleta xorîya ke vane gere na bone. Çike nînan Tirkîya rêye gureta binê mîneta xo. Tirkîya na çeta ra pers bena. Kamcîn kemere kena berz bine ra zê morê sîyayî çeta ergenekonî vecîna. Çerxê Tîrkîya bi gorê waştena nînan çerexîyenê. Heyanî darbeya sera 1980 kî, rena bi plan û programê nînan bîya.

 

Tirkîya de nê rojan tayê cayî dayî ra û serê hardî, binê hardî pirê top û tifengano. Kamcîn çale danêya ci ra cebilxane (cephane) vecîno. Honde cebilxano ke binê hard ra vet. Kam çizano bi nê çekan çand merdimî kîştê, çand dewî bombê kerdê, çand domanî bê ma û bê pî virdê. Kam mezano kî dewlete naye rind zana.Bi beçika dewlete nînan însanê bê suc û bê gunayî kîştî. Herçiqas ke faîlê xo kifşe bî kî, nînan kîştêne dewlete kî vatê: "Faili mechul" Erdoxan çiqas ke helana bido xo vaco "ma kesî ra minete nêkeme û kes ra kî nêterseme. Tirkîya nê çeteyan ra keme pak" vaco kî ê Erdoxanî qeseykerdene ra dot çîye nîyo. Ewro Ergenekon meşte kî yew çete de bîne vecîna mîyan.

Îsraîl û Fîlîstînî

Fîlîstîn ser o adir û kile varena. Îsraîl bi qewet û top û tifenganê dewletanê emperyalîstan Fîlîstîn ser o zulim û zordarîye keno.Yahudî çimanê dînya ver de qetlîyamê însanetîye kenê dinya xo no re kerîyenî. Îsrail bîyo ezraîlê Fîlîstînî. Qic û pîl nêvano zê mişonî ser o gêreno. Ver çarno ra însananê sîvîlan û domanan juver şono. Bi ax û waxe bi xapitena hesîra çiman no zulimê Îsrailî nêno vindarnayene. Ganî dewletî tekîlîya xo bi Îsraîlî derhal bibirnê.

TRT-Şeş

Herçiqas ke taye Kurdan mîyan de bi TRT-caş berone vatene kî, hîre hefte wo ke weşanê xo berdewam keno. Taye Kurdan ra gore TRT-şeş game de rinda, tayîna re gore kî na nezdî bîyena dewlete raşt nêvînenê. Na mesela mîyanê hunermendanê Kurdan de kî nîyara.

 

No semed ra hunermende Kurdan xo mîyan de bîye diletê. Tayê hunermendan pêşnîyazê / teklîfê TRT-Şeşî qebul kerd. Tayîne kî no pêşnîyaz pêy de çarnaya. Nînan ra yewî kî Şîvan Perwer bî. Raştî kî TRT-Şeş no mîyan de zê pesa gêje bîyo gêj mendo. Nîka nê mordemekan elfabeya Bedîrxanî qebul kerda. Mi ra gore game de rinda. Merdim ganî cire wayîrtîye bikero. Dewleta Tirkîya heyanî nîka vatê hona hona kî vanê "yew dewlete, yew ala/beyraqe, yew mîlet, yew bawerîye û yew ziwan"naye ra gore merdim ke naye bîya ro çiman ver nika nînan ra ziwan ewro dezgehê TRT de ke qebul kerdo peynîya xo kî giran giran ena. Nika dewleta Tirkîya na heqa nîyanene kêfanê xora nêda. Ewro taye gamî ke ame eştene hete dewleta Tirkîya ra, bêguman bi emeg û kede bi fedakarîye û têkoşîna Kurdan, nê gamî ame eştene.

Wusênê Gestemerde

Berlin, 18.01.09