Gestemerde Online

Akp pukê haştîye de xeneqîye 

Bi rengê gula sure, bi hevîye, bi hîs û coşê hîrisê adare her kes re merhaba. 

Bi coş û germayiya adirê Newroze Kurdî şî weçîntîş û bi nê coşî kamîya xo re wayîr vecîyayî.Rêna bi amayîşê wusarî, her ca bi rengê gula sure xemelîya û Akp kî kerd binê vare ra.

Mi ra gore Akp no weçîntîş kerd vîndî. çike weçîntîşê sera 2007 de oranê rayanê Akp %47 bî. Nê weçîntîşê 29 adare de kî oranê rayanê Akp %39 wo. Yanî gorê seranê verî 7-8 puanî gunawar o. Na kî ena namana ke Akp sere bi sere gonî kena vîndî. Henî aseno ke heyanî weçîntîşê bînî Akp ra eserê nêmaneno. Nê weçîntîşê 29 adare de nînan bi zordarîye bi dek û dolaban her raye cerebite kî cira çîye nêvecîya. Ne komirî, ne kî maqarna Akp ranêxelesnê. Tênîya komirî rîyê Akp kerd sîya û na tênîya komirî bi awa zemzeme kî endî nêna şutene. 

Eke nê milet ra 'Ya sev ya terk et', 'Kadin da olsa, çocuk da olsa geregi yapilacaktir' ame vatene, no mileti kî qerarê xo heskerdene û terknêkerdene re dano ci. Çike yewo ke ganî terk kerone, o kî Akp wa. Nê vatenê Erdoganî kesî xo vîranê kerdî û heyanî sandiqa weçîntîşî. Bi nê vatenanê xo yewi kî vazena ra Dersîm û Amed wazena. To bi sene rî Kurdan ra rayan wazena? Sima heyanî nika nê milet re çi xizmete kerde? Gelo çi heqa şima esta ke şima nê miletî her xizmete ra mahrum virdêne? Xizmete kî hete de, şima nêvirda ke feqîr-fuqare letike nan bi rehetîye burone.  Nê weçîntîşê 29 adare de rind ame zanitene ke pîştîya zulmkaran endî Kurdîstan de şîkîya. Na saate ra tepîya partîyê sîstemê qilerînî endî xo ser raşt nêkenê. Çike Kurdî endî heşarê serê xo bîye. Welatê xo re, kamîya xo re, ziwanê xo re, kulturê xo re… bê şert û şurtan ci wayîr vecîne. Ganî partîyê sîstemî kî nê weçîntîş ra derse bicerê û naye ra tepîya kî ganî gamê pêtî bêrene eştene. Yanî mesela Kurdan koke ra berone guretene û bi raya demokrasî ganî na mesela çareser bo. Sima bi çimanê xo dî ke na mesela teyna bi TRT- Seşî çareser nêbena. Ne kî bi îmha û înkarkerdîş na mesela halnêbena. Ne xo bixapnê ne kî xo biqarnê. Hona ke rewo, hona ke raye nerzdîya rengo ke sandiqanê weçîntîş ra vecîyo bicerene diqat. Nê tersê zerê xo endî bişiknê û berzenê, ribalê nê tersê çima ra, Tirkîya ravêr nêşona. Hona anê rojanê verî  Serokwezîr Gül şî Îrak de qalê Kurdîstan kerd, ame Tirkîya de va "mi çîye de nîyanen nêvat" Ewro serê hard ra ke Kurdî estê, welatê xo kî esto, ziwanê xo kî esto, kulturê xo kî esto. Naye endî rind bizanê ke, bi ters, bi îmha û înkarkerdîş şima game ravêr nêşone. 

Ha naye kî şima ra vacî "şima no weçîntîş kerd o vîndî û endî milet gumanê xo bi şima nîyano." 

Wusênê Gestemerde

Berlin, 30.03.09