Başbuğ adir de zaf xirabin kaykeno PDF Yazdır e-Posta
Wusên tarafından yazıldı.   
Cumartesi, 13 Haziran 2009 13:48
Domano qij ke reyê adir de kaykerd û destê xo na adir ra, vêşna, reya dideyîne kî êndî adir de kaynêkeno. Yan kî merdim ke cira va "bûva bena" o kî xo adir ra şevekneno. Ê nika Başbuğ adir de kaykeno, ez vajî bûva bo. Çi hêf ke canê ey nêvêşeno. Çike canê xortanê Kurdan û Tirkan vêşeno. Nê adirî de kezeba mayan vêşena. Naye ra kî no merdimek zewq gêno û beno şad.  Hebê ke werte beno sûkitîye, merdim vano belko êndî seba haştîye gamî ênê eştene çik o. Ti handê nîya dana ke werte kewto têmîyan ra. Haybiro axîrşer vaşto ra. Çi hekmeta ki Tirkîya de eke qalê haştîye kenê tansîyonê tayîne xaftela ca ra vazeno ra û heyanî cila merdene kî şono.  Heto yew seba haştîye merdene gureta çîmanê xo ver û wazenê bi dîyalog na mesela êndî hal bo, heto bînî kî çiqas ke dest ra ame nê adirî keno gûr û nêverdano ke wa şoro xora. Ewro Kurdan ra zêdeyêrî Tirkî sûkitîye, haştîye û biratîye wazenê. Ewro ke Tirkan mîyan de seba çareserbîyena na mesela yew referandum ke bibo, ez hênî bawarkena ke Tirkan ra; sedîne ra heştaye (%80) wazenê na mesela koke ra hal bone. Labelê çihêf ke îdarekerdoxê dewlata Tirkîya qet roje seba hîna pêtkerdena biratîye, cîrantîye û dostênîya nê miletî qasê misqale çîye kar nêkerd. Çike Erdoğan û Baykal ra çareserbîyena nê meseleyan cavirda zê domananê qican kewtê ra yewbînî. Nînan Tirk û Kurd yewbîn re kerd dişmen. Biratîye û cîrantîya ke bav û kal ra mendîbîye nînan adir virda ci vêşnê. 

Başbuğ vano "Arar, bulur, yok ederim" hawo bî 20-30 sere ke şima bi "Arar, bulur, yok ederim" î çîye hal nêkerd. Naye ra dime şima se hal kenê na mesela? Bi seran o ke nê adirê cehenemî de canê însanan vêşayî, dewî vêşayî, koy vêşayî, dar û ber vêşa… nê zlum ver kemer û kuç ame re ziwan. Kemere kemere ser ro nêvirde. Başbug bîyo ezraîlê haştîye. Ceng wazeno, can û gonî wazeno. Dest ra ke bêrone Kurdan yew koçika awe de xeneqneno. Tirkîya heyanî ke binê mineta dîktatoran û paşayan de bîye, ne mesela Kurdan hal bena ne kî  tawa. Se ke Ahmet Altan nêvano "Askerler siyaset yapacaksa, askerliği kim yapacak?" Erdoğan û Baykal ra ke kewtî ra yewbînî, sîyaset kerdene kî endî paşayanê fermandaran re kuna. Ewro hukumatê Erdoganî, partîyê muhalefetî, sêyasetmedarî û îdarekerdoxe  dewlata Tirkîya paşayanê xo re  emr-qulênî ra dot çîye nêkenê.

Zaf dewletanê dînya meseleyê xo yê nîyanenî rewêna bi rindîye, bi dîyalogû  bi raya demokrasî halkerdî. Ê ma kî dormê xo de kewtê gujike. Ha şîye ha şona ma dest Tirkîya vanê. Ê xo ra Tirkîya şîya. Şima bi polîtîka xo ya şaş û beşe Tirkîya arde na noxta. Pere-polo ke şima heyanî nîka herb re xerckerd bi nê pereyî şima  seba rojhelatî xêle xizmete de rinde kerdenê. Pere-polî kî hete de bi hezaran milet amê kiştene na mesela hal bîye?  Hal nêbîye. Her di hetî kî bêrê êndî no adir o ke canê însanan vêşneno, awe civerdê bişaynê. DTP de qey dîyalog nêno viraştene? Şarê Kurdî nê wekîlê xo bîlasebe nêrûşnayî meclîsî. Seba haştîye no yew firsat o û îlacê na nêweşîye kî dîyalog o.

 Wusênê Gestemerde