Dewranê Dinyayê PDF Yazdır e-Posta
Wusênê Gestemerde tarafından yazıldı.   
Pazartesi, 03 Ağustos 2009 14:11

Demê bî waxte bî Koyê Bîngolî bi şên û şênatîye zîngênê. Zê Xanê Xizirî şên û awa bî.Ewro kî saya serê dewleta Tirkiya ra Koyê Bîngolî bîyo xanê xirabî. Seranê 1990 ra nat dewleta Tîrkîya şîyena waran qedexe (yasax) kerd bî.Bi na qedexe kerdene derbe de girane daybî dewijan ro. Hêyan ke dewijan mal û milkê xo bêpere-bêpol êşt awe ver û welatê xo terkit û şî. Endî warê bav û kalî xo terkit bî. Îp û isize bî warê.

Tivate belko Uriz ver remay bî. Lê dewîjî na rêye Uriz ver nêremay bî. Na rêye zulmê dewleta Tirkiya ver warê bav û kali xo caverday bî û şî bî. Bêvengiye endî ca bî cayê Koyê Bîngolî zê mijê payîzê pêyenî gureti bî ra binê hukmê xo. Koy bêvengiye ver zîbenê, nalenê û kalenê. Henî ke bêkes henî ke bêwayir gunaybî war o. Belengazîye, bêkesîye, hesîrîye û rebenîye zê sirrî wedardayîye bîye virana koyan de. Zar û ziwanê xo ke bibîyenê zaf çî arde ra ziwan.

Çihêf ke heyla-heyla berîvanan, huwayîş û qerayîşê domanan, hoka-hoka şuyanan û bizekvanan, qara-qara biza have û xûlpa-xûlpa doyê meşke endî demê vîyar teyî de mend bî. A şên û şênatiye Koyê Bîngolî ra eserê nêmend bî. Hurendîya ray û rêçan kemer û kuç ra kifşe nêbîyene. Zurîya ke ê ray û rêçan ra milet amay bî û şi bî. Kam çizano ê ray û rêçan ra çand rêy koçê waran ard bî û berd bî. Kam çizano çand rêy bîbî şên û ava. Kam nêzano kî, ray û rêçî, ko û tumi hard û asmên naye re şahid bî.

Nê koyan ra endî ne wayirê kewres asparî gêrenê, nekî endî Asporê Koyê Bîngolî gêrenê. Teyr û tur firnêdenê. Mêşe nêvingenê. Pepugî nê koy xore kerd bî tomete. Gegane guva-guva vay de bîyene heşar bêvengîya koyan. Herçiqas ke xori-xori nalayişê koyan ters û xof bidenê merdimî kî ancîya kî destê merdimî cira nêbîyene. Çinke ko û tumî mare heval bî, mare hevîye bîye. Çinke ma virana nê koyan de gunaybîwaro û vaştîme ra. Ma ê ko û tuman ra game bi game, çime bi çime, ç unge bi çunge gêrayme hêyanî koye Koxe. Ma bi kulman awa serdine şimit bî û bi çengan wela nê koyan werd bî. Tivatê belko qerayişê ma, berbîşê ma, huwayîşê ma kaykerdîşê ma û remayîşê ma zê sahna yew filmî daybî vinder nayene. Herçî endî bîbî şaneke. Endî miletî mîyan de zê yew şanika zê yew hêkete amenê qeseykerdene. Zere a şanik û hêkete de ma kî caye xo guret bî.

Ewro kî mare peynîya pêyene de a şên û şenatîya Koyê Bîngolî ra bîrîye, hesrete û xorî-xorî ax û wax antene mende.

Kam xore se vano wa vaco, lê Koyê Bîngolî bêkesîye dest zar ziwan de bî. Çihêf ke no dewran dewranê dînya nêbî, no dewranê dewleta Tîrkîya bî. Herçiqas ke to nîya dim xo de kî, no dewran to re kî nêmaneno.

Wusênê Gestemerde
 

Yorumlar 

 
#1 xidir SeFeR 05-08-2009 19:50
GULANE SURA CIMDENE...

Deste ma na rindekiyere se bi? Ez vaji simare. Hayateki bi zamane wagte veride welatede. Domani muxsuz girs nibiyene uca.Kutikan, pisingan u kerganran seksek u cekeki kaykerdene zaf zaf, verte jubinde ki sof pero dayisi ki cine bi.cucikan loriki watene, kesikan'ki qet istife xon terk niker biyan bi, vauy sosun i zerya xo kerdbi pelane qavaqan esko de xoridebi hinke cira heskerde ne.

U roje piyaye'de kirsi amam bi destande ciye tamase ki biyay bi "kay gediya gelen domanan hade ciyanen xo !"bi gerayis vat bi camerda nen kirsan, domana fam nikerd bi" ceman ita ro (evlerimiz burasi) demisler. xo sas ker do piyanen girsa "eke hino ciyanen xo ra daha duri" (oyleyse evlerinizden dahada uzaga ) ebe persayis u qere dayis. Domanan bi cahre mendayinen cikaki honan ki doman biye.

U roje soder savakra pero piya kevte be raan u sukane geribiyan .

Endi koan ne Bingolra vay be wango eno, locinara du nevejino, tede kutiki ne lawene, dorme de qire qira miyane sura u ore - ora mangane gewra (Gonya mi bi ningara bone) ne kuna teyma. Ceveri tede kilite, gome u tawle pero gine piro, dari biye husk, diwari rijiye, ziyani biye xirabe, vay biye piri, ray biye kor. Heywax hey limin.
Alıntı