Gestemerde Online

Her yew festîval reng û veng o, ziwan û kultir o, tarix û kamîya, coş û şahîya, haştîye û biratîya...

Na mana de Festîvalê Munzurî û Festîvalê Koxe kî bêguman armancê de xo esto. Xora bê armancî kî yew festîval nêbeno. Mi ra gore bingê û giranîya Festîvalê Munzurî û Festîvalê Koxe kî ziwan, kultir, tarix û kamîya ma ser o bone ganî. Çike merdimo ke tarixê xo rind nêzanit, ne kamîya xo, ne kî ziwan û kultirê xo nasnêkeno. No semed ra kî komîta kar organîza kerdena festîvalan ganî nê mewzuyanê muhuman ser o bi diqat vindonê.

Programê “9. Munzur Kültür ve Doga Festivali„ de di çîyan balê mi ant:

Yew panelê „Dilimiz, Kültürümüz ve Isimlerimizi Geri Istiyoruz“

Yewî kî „Kûlê 70 Serre û Mezelê Sehîdanê Ma Kotîre“ bî.

Nê mewzîyê muhumî seba ma seba şarê ma zaf muhimê. Kul û dejê 70 serre hêyanî nîka qey nîyame têrapîştene? Ewro şarêma qey nêşîyenê mezela Sêy Rizayî ser. Hona no dej şenik nîyo, ewro kî vaştê ra wazenê Dersîmî binê awanê baralî de bixeneqnê.

Naye ra gore parlamenterê Kurdan nê mewzuyanê muhiman bi önerge berênê parlamento û nînan ser o berone qeseykerdene. Naye ra 60-70 serre avêr dewlete namê şaristanan/şukan, namê dewan, namê mintiqan û namê cayan pêro virnayî kerdî bi tirkî. Hêyanî nameyanê ma kî merdimekan virnayî û gore kêfê xo nameyî nayî ma ra.

Ewro kî ma na nêheqîyenî qebulnêkeme. Ma nameyanê xoyê orjînala peyde wazeme! Ma re „Tunceliye yakî Varto“ cîye îfade nêkeno. Waxt o ke va: Welatê zîyar û dîyaran, welatê şêran, welatê şehîdan û welatê qehramanan... o taw bi namê şan û şoretê xo Dersîm û Gimgim vecîno mîyan. Çike gonîya sarê ma nê hardan ser o rişîya. Înan sebeta welatê xo serê xo da. Nê nameyî bav û kalê ma ra, ma re yadîgar û mîras mendê. Na mana de tarix û kamîya xo re, ziwan û kultirê xo re hucim û wayir vecîyene kî kar û barê vile mano. Naye ra gore Festîvalê Dersîmî beno, Festîvalê Gimgimî beno yakî ê festîvalêbînî benê ganî hira hîra ca bidenê nê mewzuyanê muhiman û ser o vindênê. Ewro ma endî nêwazeme kêmasîya festîvalan ra qeseybîkerîme. Ç ike ewro ma festîvalê newîne ra qeseykeme. Waxtê kêmasîye û xeta kerdene nîyo. Ganî komîta kar organîza kerdene endî karê de profosîyonel bikero. Bê guman kemasîye û xeta bena, lê muhumîye awa ke merdim na kêmasîye serre bi serre mîyan ra wedaro.

Naye ra di heftê ravêr rojnama „Newede Dersîm“ de mi yew nustê embaza ma na hêcaye Nimet Tanrikulu ye wend. No derheq de zaf çîye muhumî ard bî ra ziwan û nivisnaybî. Nê nustê xoyê „Dersîmî Unutmamak!“ de, bi ziwanê ma kirmanckî dest bi nustê xo kena û bi tirkî nîya dewam kena : „Anadilimi anlayip da yeterince konuşmamanin eksikligini derinliklerimde hissediyorum. Kaybedilmek istenen kültürümüze olan borcumu bir nebze ödeye bilmek ve unutmamak için yazabildigim sürece birkaç cümle de olsa yanlişyapma riskini göze alarak anadilimiz üzerinden sizlerle buluşmanin duygusunu, heyecanini paylaşmak istiyorum...“ Na ca de embaza ma, bi qeyret û cadkerdena xo, bibirîye û hesreta xo ziwan û kultirê xo re zere û can ra ci wayîr vecîya. Yanî merdimê zê Nimete şarê ma mîyan de zafê. Ez hênî bawerkena ke embaza ma roce nê roce ziwanê xo bi serbestîye qeseykena û nivisnena. Raştî kî şarê ma vêşan û têşanê ziwan û kultirê xo wo. Na kêmasîye mîyan ra wedardayene kî misqale bone kî kar û barê festîvalan bone ganî. Festîvalî teyna bi dawul û zurna govende kaykerdene nîya... Festîvalî reng û vengê ma re, ziwan û kultirê ma re, tarix û kamîya ma re wa endî raya roştî benê.

Bi reng û vengê xo nê festîval de ca guretena hunermende de hêcaye kî rindekîye de bîne bîye. Kamî bawer kerdene ke roce hunermenda zê Sezen Aksuye Festîvalê Dersîm de vecîna bi ziwanê kirmanckî lawukan vana. No kî xo ser o çîye de muhim bî. Seba haştîye û biratîye mesaje de rind da. Na noxta de hunermende Tirkan û hunermende Kurdan doş bidenê doşî bi sanata xo, bi muzîk û hunerê xo na gama ke seba haştîye û biratîye ama eştene ganî destek û piştî ciderenê.

Wusênê Gestemerde