AKP Mesela Kurdan Çareserkerdene de Çiqas Samîmî ya? PDF Yazdır e-Posta
Wusênê Gestemerde tarafından yazıldı.   
Çarşamba, 02 Eylül 2009 19:35

Serran ra tepîya hûkûmatê Akp gama verenê eşte. Herçiqas ke na game here ama eştene kî, bîr û bawerîya ma pêroyîne awa ke: bi raya dîyalogî, bi raya demokrasî, bi raya haştîye … heyanî ke na mesela bi rindîye çareserbîye wa dewamkerone. Çûnke na game seba miletê Kurd û Tirkî zaf muhime bîye. Lê peynîya xo ke bêrone... Çunke fîtne û fasadî zafê nêwazenê na mesela Kurdan hal bo. Ti honde nîyade ke xo peyser guret.

 

Na herekewtena Ahmet Türk û Serekwezîrê Dewleta Tirkîya Erdoganî ra raştî kî her kes kêfweş bî. Lê, lêwe na kêfweşbîyene de kî, bêguman kêfnêweşî kî zaf bî. Nê kêfnêweşî  çiqas ke of û puf kerenê û kîşta bipoynenê kî, rew-here ganî na mesela çareser bo. Hukumatê Akp ke raştî biwazo û samîmî bo na mesela halbena. Her çî  ra avêr  ganî samîmî û honde kî cîdî bone. Na mesela çareserkerdene de samîmîyet, nezdîbîyene û cîdî bîyene zaf muhuma. Eke samîmî û cîdî nîya ne xo tede virdo, ne kî xo rezîl û rûsifayê cîhanî kerone. Ewro yew proja haştîye ra qeseykenê û gore vatenanê înan na proja di-hîre aşmê bînî yan kî nerzî de vecenê mîyan. No mavên de AKP û DTP dîyalogê xo hîna pêt û xurt kerone. Problemanê Kurdan “A ra heyanî Z ye„ binê çatîye parlamentoyê Tirkîya de ganî bêrenê qeseykerdene. Herçiqas ke destekê partîyanê muhalefetî çînebone kî, bê destekê muhalefeî kî şîkîna probleman koke ra halkerone. Çunke, hêz û qeweta xo cadera. Honde ke gaman pêt berzo, xoverbido û projeye de hîraye û hewle bo. Yanî çareserîya de demokrasîye û bingehîne bone. O taw mesela bi xo zê lakê gilendike yewbînî ra cêserkûna êna.

Ez bawerkena rêya verêna ke na mesela ser o Tirk-Kurd her kes fikrê xo bi serbestîye ano ra ziwan, destek dano ci û ser o munaqaşa kenê. Lêwe naye de kî taye kesî na mesela xo het ser ancenê. Yan kî her kes wazeno naca ra çîye veco. Xo bi xo nîjnenê û rijnenê. Ti honde nîyadana ke narêye kî rijnenê. Yanî gore xo hesab û kitabê çareserîye kenê. Her kes xo hete ra qilifê derzeno. Se ke mi corî kî kifşe kerd, her kes wazeno naca ra çîye veco. Nika ra partîyê sîstemî hesab-kitabê weçîntîşê serra 2011 kenê. Herçiqas ke Akp vaco: “ma seba çareserkerdena na mesela kewtîme rîzîko“ kî, ê bi na proja vecîne meydananê weçîntîşî û propaganda xo naye ser o ramena.

Na babete (mewzu) ser o her kes çîye vano. Heya vatena xo wa vacê, lê merijnê. Hona ke na game ama eştene ganî her kes xo het ra destek bido na proja. Hênî bo ke game bi game wa verba raya haştîye şorone. Ma hetanî nika vatê: ”DTP qey muhatab nêna guretene?” Ewro kî na partîya Kurdan seba çareserkerdena mesela Kurdan muhatab ama guretene. Naye ra rind…Eke hênî ro, nê wekîlê Kurdan seba çinayî şî meclîse? Herhal de seba kêfê xo nêşî. Bi her çî mana vînîtene na mesela halnêbena. Öcalan, Kurdan pêroyîne temsîl nêkeno. Ganî ma naye kî rind bizanîme ke, ewro xêlê dêzge û komelê Kurdan estê. Nê dêzge û komelan kî na qavga de qasê qeweta xo mucadele kerde. Xora ke merdim na mucadela înan înkarkerone na kî nêheqîyenîya de girda. Mi ra gore DTP muhatab guretena ameyene de qerarê de raşt o. Ganî hukumat bi DTP ra yew masa de ronîşê û na babete ser o rind  munaqaşa bikerone û hona qerarî bêrenê guretene.

 Hêvîye esta. Bi hêvîya haştîye bimanê weşîye de.

 Wusênê Gestemerde