Gestemerde Online

Ziwanê kirmanckî (zazakî) mîyanê çar dêsan de mahkûm û bêçare mendo. Tivanê belko no ziwan sêyê verê dês û duwarano. Şarê ma qedr û qimetê nê ziwanî çihêf ke nêzano. Cire wayîr nêvecîn o û bi ziwanê xo Heq nêkero caran qesey nêkeno. Tivanê bel ko no ziwan xo re kerdo tomete. Lê ma ziwanê tirkî dime xo helak kerdo. Xizmeta ke şarêma heyanî nika ziwanê tirkî re kerda, wullahî “Türk Dil Kurumu“ na xizmete ziwanê xo re nêkerda.

Gelo şarê ma se û qey ame na nuqta?

Çunke şarê ma xo mîyan de bîyo lete lete.

Çunke şarê ma mîyan de organîze bîyene çîn a.

Çunke şarê ma mîyan de kar û gure pîya kerdene çîn a.

Çunke şarê ma mîyan de “Ez ke, ez a“ no fikr ustino.

Çunke şarê ma mîyan de yewbînî re destek vecîyene çîn a.

Çunke şarê ma mîyan de yewbîyene çîn a.

Çunke şarê ma mîyan de qedr û qimetê emeg û kede zanitene çîn a …

Coka şarê ma na hal der o. Cako ziwanê ma çar dêsan mîyan de mahkum û bêçare mando. Ewro bi reng û vengê ziwanê ma qey yew rojname (qezeta) de ma çîne bîyenê. Gelo şarê ma honde kî bêçare mendo? Honde kî belengaz û ûstexar o? Hondaye roşnvîr û nuskarê ma estê, gelo nê mewzu ser o qey nêvindene û munaqeşe nêkenê? Ma tivacê gelo qet heqa ma çin a, ma kî bi rengê ziwanê xo yew rojname biwanîme. Honde kî qedr û qimetê nê ziwanî çîn o. Rojanî nebo kî hama qet nêbo wa desûpanc rojî de yan kî aşme (menge) de reye bi reng û vengê zîwanê ma yew rojname vecîyo. Ma kî henî ax û zar me ke wa ziwanê ma caye bero nusnayene, ya kî cayê berone qeseykerdene. Çihêf ke ziwanê kirmanckî mîyanê çar dêsan de mahkûm û bêçare mendo.

 Rojnameyê û televîzîyonê Kurdan gelo çiqas ca danê ziwanê kirmanckî?

Çi hêf ke çapemenîyê Kurdan kî hondayê ca nêdanê ziwanê kirmanckî. Herçiqas ke tayê rojnameyê kurdan ripelanê rojname xo de misqalê ca danê ziwanê ma kî, na kî seba ziwanê ma çareserîye nîya. Vîst ripela rojname ra, ke nêm ripele ca dîno ziwanê ma, wa qet ca cinêdîyo tayîna rind o. Çapemenîyê Kurdan kî ganî na mesela bicerenê rojeva xo û ser o rind bifikirîyê. Çunke wendoxê nê rojnameyan zaferî mileto Kirmanc (Zaza) wo. Rojname wa ke ziwanê mire wayir nêvecîye, ma, ez se a rojname re wayir vecî?

Ma televîzîyonê Kurdan çiqas ca danê ziwanê kirmanckî?

Ma guna kesî mecîme, lê no derheq de mi ra gore di sebebê xo estê: ya ma çîye beşenêkeme nîyame mîyan yanî ma dest ra çîye nêno, yan kî nê merdimekan nêwazene ca bidê ziwanê kirmanckî. Madem ke vistûçar saatî weşan kenê nê televîzîyonê Kurdan, ma tivacê qet heqa şarê ma kî çîna ke bi ziwanê dayika xo saate-di satî televîzîyon temaşe kerone. Qet heqa xo çîn a ke da-vîstê deqa hama goş ra veng û vacî ser no. Beno ke ca danê ci. Demeke ma hondaye  goş pa nêkume ci wayîr nêvecîme. No problem reyna eno reseno ma. Demeke no kî çîye beşenêkerdena ma ra wo. Ma ca de ronîşîme şarê bînî reqne keme na kî nêbena. Ma ganî avêr qusir xo de bîvînime û hona  şarê bînî de. Raştî kî rewşa ziwanê kirmanckî rind nîyasena.

Dewam keno…

 Wusênê Gestemerde