Bi kîpkerdîşê DTP mesela Kurdan hal nêbena PDF Yazdır e-Posta
Wusênê Gestemerde tarafından yazıldı.   
Salı, 15 Aralık 2009 18:48
Partîya Kurdan DTP bi qerarê mehkemê dewleta Tirkîya ame kîpkerdene. No şermê dewleta Tirkîya rêna zê her waxtî ripelanê tarix de cayê xo guret. Ma kî nê qerarê bêhuquqî û bêadaletî şermezar keme û nê şermê înan şanemê rîy û wa Tirkîyenî ya xora  şerm bikerê.

Her çiqas ke DTP bi qerarê "Anayasa Mahkemesi" ama kîpkerdene kî, pê nê qerar de qet bêguman bêçika partîya îktîdarî û partîyanê muhalefetî kî têy esta. Çunke DTP ama meclise nîyama meclîse AKP, CHP û MHP parlamenteranê Kurdan de sare ont. Nata tondayî bota tondayî, hay û huy kerdî hetan ke meclise cire kerde zîndane. Yanî meclise de ca guretena DTP re tahamul nêkerd. DTP çitaw destê xo seba haştîye û biratîye dergê ci kerd, înan destê xo kerd girmike û da wertê çimanê înan ro. Zulm û zordarîya xo ra çîye kemî nêkerd. Tirkan qic û pîl ra hucimê Kurdan kerd. Ewro zulm û zordarîya ke miletê Kurd ser o wa, qet cayê çîn a. Bi seran o ke no zulm dewam keno. Hardanê na dinya ser o qet kesî zê miletê Kurdî sefalet, feqîrîye, hêsîrîye, bindestîye… nêdîye.

Pekî guna nê gunekaran çike bîye ke heyanî roja ewroyene şima zulmkaran nîya heqeret re ci kerd? Şima zulmkaran ziwanê nê gunekaran qedexe (yasaq) kerd, kamîya nînan înkar kerde, dewê nînan, birê nînan, koyê nînan, mal û milkê nînan, zîyar û dîyarê nînan, bi top û tifengan talan kerdî vêşnayî. Bi hezaran milet da kîştene, bi hezaran milet ruşna surgun, hona hona milet çol û çolistanan ra wo. Şima Tirkî ke hurîyêndîya Kurdan de bîyene, wullahî şima nika nexşî vetîbî nexşî. Na zordarîyenîya xo û zulmkarîyenîya xo endî cavirdê. Bi qederê miletê Kurdî endî kay kaymekerê. Qatî şima kî zanenê, meclisa Tirkîya de ca guretena DTP, seba halkerdena mesela Kurdan yew firsate bîye. Lê ne AKP, ne kî partîyanê muhalefetî çi hêf ke qedr û qimetê nê firsatî nêzanit. Kesî DTP muhatab nêgurete. Îktîdar û muhalefetî bi çimê dişmentenî qatîye DTP bîyenê. Xora roja ke DTP çêberê meclise ra gama xo eşte zere, a roje ra nat kîpkerdebîye. Çunke muhatab nîyame guretene, partîyanê sîstemî nêwaştenê meclise de parlamenterê Kurdan ca bicerê. Mi ra gore DTP rewna amayî bî kîpkerdene.

Tirkîya de kîpkerdena yew partîya sîyasî çiqas bîya rehete. Bawer bike endî mehkemê Tirkan şîkînê vîst û çar saat de yew partîya sîyasî kîpkerenê. Yanî bîyo zê kayê domanan. Se ke eno zanitene nayê ra ravêr kî HEP, DEP, ÖZDEP, HADEP, DEHAP e kerd bî kîp.

Pekî, bi na kipkerdene na mesela halbîye?

Nê, halnêbîye.

Tirkîya roje bi roje verba kaosî  şîye û endî qet xo ser raşt nêkerd.Yanî bi kîpkerdîşê DTP na mesela halnêbena. Qaşo-maşo AKP yew projeya "Haştîye û Demokrasî" ye ra qeseykerd. Rind xirab na proje kî xo ser o yew game bîye. Her çiqas ke zere na proja tip û tal bî kî, game de nîyanenê amayî bî eştene. Feqet no husus de xeta PKK kî esta. Çunke Tokat de kîştena hawt eskerî gurete xo ser. Tabî na mesela çiqas raşta ma nêzamê. Eke raşta o taw PKK qey bi gruban Qandîl ra honde milet ruşna? Yanî hete ra seba haştîye gaman erzena û Qandîl ra bi gruban miletî ruşnena, hetera kî eylem kena. No çîye de raşt nîyo. Endî kam seba DTP se vano wa vaco lê dost berba dişmenî kî destê xo henekerdî.

 Wusênê Gestemerde

 Berlin, 15.12.09