Gestemerde Online

Seran ra tepîya dewa bav û kal de pêreştena gestemerdijan raştî kî nika ra heyecan û coş dana mordemî. Bîr û bawerîya mi a wa ke, bêvengîye û bêkesîya Gestemerde wa na amnanî bi şenatîya gestemerdijan şên û ava bo. Belko bi seran o ke her gestemerdij, dewa bav û kal de nîya organîze de nîyanêne xeyal kerdenê. Her çiqas ke zê hewnê şewe berone kî ez henî guman kena ke no hewn emser amnanî beno raşt.

Seba ma gestemerdijan pêroyîne no ju firsatêde zaf rind û delal o. No sebeb ra kî juyo ke îmkanê xo û qeweta xo ca der a, qedrê nê firsatî bizano û tevdîrê xo yê şîyene nika ra bivîno. Xezîla ke îmkanê gestemerdijan pêroyîne wa bibîyene û na pêreştena gestemerdijan de herkesî cayê xo bigûretenê. Wa herkesî rêna zê verî çêberê xana xo piştîye ser yakerdenê û her locina adirî ra dû wedarîyene.

Bi serano ke her juyê de ma nîşt re cayê, her çar parçê dînya ra bîme vila zê gilanê daran ma pijikîyayîme. Bîme lete lete, hurdî hurdî, ewlad maye û pîyî ra, cîran cîranî ra… kewt durî. Hesret û bîriya serran ma helenayîme û zê derdê bêdermanî zere ma de bîye qat bi qat.

Ma kamaxa xerîbîyê xo rê qeder zanite û kewtme ra û dirban. Destê ma kesî dewa bav û kal ra nêbîyenê. Her kesî sare xo guret hetê ser şî. Tayê ma feqîrîye û hêsîrîya xo ver, tayê ma bêkesîya xo ver, tayê ma risqê zav-zêçê xo dime, tayê ma kî zulm û zordarîye ver… şî.

Lê ewro kî welat ra durî kewtîme. Bîme xerîbê welatê xo, bîme xerîbe hevalê xo, bîme xerîbê cîranê xo, bîme xerîbê qomê xo… Ax û waxa welatî zê kermê qota dare zereyê ma werd. Kamaxa xerîbîye de bîme wayîrê derd û qotikan. No sebeb ra kî ez nê pêşnîyazê (önerî) serokê komela Çob-Derî zaf rind vînena.

Seba naye kî ê mi kî no derheq de tayê pêşnîyazê (öneri) mi estê.

Pêşnîyazê mi:

Seba kar organîzekerdene ju komîte bêrone weçîntene

Organîza nîyanêne ra xebera gestemerdijan pêroyîne bibo û  Çob-Der cîrananê ma yê teberî re silayîye birûşno.

Seba hefteyê kulturî program bêrone hazir kerdene

Mi ra gore programê hefteyî nîya bone:

Hazir Baba zîyaretkerdene û Koyê Bîngoli ra cêrayene;

Pîknîkê Dara Memê Şane;

Qic û pîl ra mezelan zîyaretkerdene;

Çadir Baba zîyaretkerdene (arayîye û perojîye uca berone werdene);

Kebanîye dewe gere bi hunerê xo kulinda Gestestemerde biderê naskerdene;

Madem heftêye kulturîyo, muhumîya zon û kulturê ma ser ro kî berone vindetene;

Kongreya Çob-Derî ;

Şewa dengbejanê gestemerdijan (dengbejanê dewanê dormî kî şîkînê silaye kere) û bi sinevîzyon program wa bixelesîyo.

 

Wusênê Gestemerde