Qatîl û gewendê ke qehreman benê delîl halê ma feqîran rê PDF Yazdır e-Posta
Wusênê Gestemerde tarafından yazıldı.   
Çarşamba, 27 Ocak 2010 14:34
Qatîl M. Ali Ağca endî ma mîyan de serbest cêreno. Se ke eno zanitene nayê ra hêştê ravêr qatîlê Abdi İpekçi û suîkaskerdoxê Papa Jean Paulî, M. Ali Ağca Hepisxaneye ra serbest ame ravirdayene. Na serbest ravirdayena nê qatîlî, hetê tayê faşîstanê tirkan ra bi dawûl û zurna, bi kêf û eşq, bi coşê de gird ame fîrazkerdene. Çihêf ke qatîl û gewendê zê Ağcayî hertim Tirkîya de destan ser ro enê guretene. Qet bêqusir qedr û qimet dino ci û ûnvanê qeremanîyenî kî ser de dîno ci.

Qatîl û gewendê ke qehreman benê delîl halê ma feqîran re.

Qatîl û gewende we ke ponc perê nêkenê ewro bîye qehreman, bîye wayîrê namî, bîye wayîrê şan û şoretî, bîye wayîrê qedr û qimetî... Hepisxaneye de zê paşayanê, waxto ke vecînê teberî kî qehremanê. Hepisxane de waştena nê qatîlan yew bi yewe û bêqusir ena ca. Nînan re xizmete û azete bêqusir ena kerdene. Çunke nê qehremanê dewlet babayê. Kes nînan ra nêşîkîno çîye vaco. Xizmet û azete kî cire ena kerdene, unvanê qeremanenî kî dino ci, xelate kî dîna ci, nêruşnenê eskerî kî… coka dewlet babaye û nê qehremanan nîya qedr û qimetê yewmînî zanê û nîya virane vîşta yewbînî ra. Nînan piştîya xo şanite têpiştîye û bi hezaran însanê bêsuc û bêgunayî kîştî û hona hona kî kîşenê. Her yew koşê Tirkîya de yew çeta, yew qatîl, yew qehreman... esto. Coka ewro qehremanî zafê û qehreman, qehreman ra vano: bota şo. Nê qehremananTirkîya xo mîyan de pare kerde û gorê keyfê xo cîrît kaykerd. Tirkîya talan û weran kerde.

Heto bîn ra kî hepisxananê Tirkîya de bi hezaran însanê bêsuç û bêgunayî marumê zulm û zordarîye mendê. Mîyanê çar dêsanê hepisxaneyî de her heqa însanetîye ra marum û bêçare virdê. Nê zîndanan de dinya teng û tarîya. Ne roja xo, ne kî şewa xo kifşe wa. Nê însananê  bêsuç û bêgunayî halê xo hal nîyo. Tengasîye, bêkesîye, zor û zametîya hepisxaneyê kamaxî  bêrenê rêye kî nê bêgunekaran ra persenê. Hepisxaneyî ci re kerdê teng û tarî.  Yanî zê qatîlanê qeremanan her waştena xo nêna ca. Nînan re heq, huquq û adalet çîn o. Ya bi îşkenca enê kîştene yan kî heyan ke hepisxanê de benê marumê zulm û zordarîya dişmenî manenê. Yanî rewşa hepisxananê Tîrkîya nîya ra.

Ewro kî gewendê nê ver û viradan bîye qehreman û şhow kenê. Wa ê nîya dim xo dê, wa ê nîya qehremanenî bikerê... Bêbextî bêbextîye de şonê. Roje nê, roje heqa feqîr-fuqarî, heqa mazluman, heqa bindestan, heqa domananê bê ma û bê pîyan… pirnikanê nînan ra fîtîl fîtîl ena.