Gestemerde Online

Ya Xizirê saata tenge, ya Xizirê kelek û gemîyan… vacî û hona  dest bi nusê xo kerî.

Nê rojan, rojê Xizirê Kalî yê. Rojê xêr û xêratanê, rojê nîyaz û mîyazanê, rojê cem û cematanê, rojê haştî û  dostenîyê… Xizir hertim roja tenge de hazir û nazir o. Xizir bi ram o. Xizir comerd o. Ma de haşt û yar bone! Xizir, pîye feqîran o,  meymenê saata teng o û caran kesî tenge de nêvirdano. Sala ma û zaf-zêçê ma, aj û amênê ma, cîran û qomê ma, nas û dostê ma, heval û hogirê ma… caran tenge de nêvirdo. Belko ma berzo bo û xatirê xo. Ma de heval bone, pîştî bone. Ma gunekar û xetekarîme, wa belko guna û xeta ma ra vêr o.

Zaf seran ra tepîya ez na ca  Berlin de rêya virêna ke şîya Cemê Xizirî. Wa weş û war bo û Xizir çetine bi ci nêdêr o, Çekoyî bi telefon xebere dê mi û va "Cemaatê Dêrsîmî, mêşte Cemê Xizirî giredanê û ma şome uca, şima kî êne xo re bêre" na xebere ra dime roja bîne şande (12.02.2010) mîyazê xo guret û şîya Cemê Xizirî. Lê, tawo ke ez çêber ra kewta zere, Pîr hona cayê xo de nênîşt bî ro. Mi kî vatê belko zê cemê dewe mordem ke şî huzurê Pîrî, bi mîyaz û nîyazê xo beno çewt û bi duwa Pîrî gulbangê xo cêno. Gulbangê xo ke guret şono kelê xo bi destê Pîrî birneno û waxto ke nîştro huzurê cematê Pîr de eno ra çokan, Pîr rehetîye dano ci û hona rehet cayê xo de nîştenê ro. Mi kî waştê ke şorînê destê Pîrî kelê xo bibirnî û gulbangê mîyazê xo bicerî hona şorî cayê xo de ronîşî. Feqet mi ne kelê xo birna, ne kî  gulbangê xo guret. Mi kî zere xo de hîre rêy va "Ya Xizir, Ya Xizir, Ya Xizir."

Xo re şîmê sukit Cemê Xizir de cayê xo guret û heyanî ke Pîrî amayî û post de cayê xo guret. Na esna de kî herkesî gorê cemê edeb û erkanî cayê xo guret. Pîrî sere de razîbîyena cemaatî gurete û dest bi Cemê Xizirî kerd. Zêderî bi zonê ma kirmanckî (zazakî) îbadet kerd û cemaatî pêro-pîya ju fek ra venga Xizirê Kalî da. Cem de juyo ke xo re waşt seba Xizirî sema şî. Her çiqas ke çimanê mi ra hêsîre nîyame kî, mi kî zerê xo de bêveng venga Xizirê Kalî denê. Hona ke cem nêxelesîyayî bî, mîyaz û loqmê ke miletî ard bî, ju rêye de Pîrî duwa pêroyîne dê û no mîyaz herkes ra juyane hetê xizmetkaranê cemî ra ame vilakerdene. Werdena goşt û bûrxûr ra dime Pîrî duwa sifrî dê û cem bî vila.

Tawo ke ez hona dewe de bîya, çê ma de hama-hama her sere cem girê dîyenê. Nê cemî zêderî hetê Bava Sêy Wusênî (Keça ra) amênê giredayene.Yanî mi zaf cem û cematê Bava Sêy Wusênî dî. Nika mordem nê cemî û cemê ke Bava Sêy Wusênî giredenê  nêşîkîno ju piren kerone. Mi ra gore werte de zaf  firqe esta. Yanî taye çî kî giredayîye îtîqatê însananê. Yanî mordem nêşîkîno cemê ke na ca êne giredayene û bi cemê ke welat de ame giredayene têverşano. Bava Sêy Wusênî ke vatê "Ya Xizir" çiman ra hesîran mecal ra jumînî nêdene. Mordemî hewes kerde ke biberbo û venga Xizirî do. Zere mordemî bi rama Xizirî bîyene pir. Bava Sêy Wusên,wayîrê kerametî bî. Wayîrê halê xo bî. Cedê êy cire wayir bî hertim.