Gestemerde Online

Ewro desûdi rojî yo ke dînya teng û tarîye ra vejîya.

Ewro desûdi rojî yo ke Xizir mi rê amo rame.

Ewro desûdi rojî yo ke mi re çêberê xêrî bîyo ra.

Ewro desûdi rojî yo ke kezeb û cigerê mi beyrame kenê.

Ewro desûdi rojî yo ke bo û pixa êyî mêratî ra dûrî ya.

Ewro desûdi rojî yo ke barê vileyê mi zaf bîyo sivik.

Ewro desûdi rojî yo ke ez hepisxanê cixarî ra serbest ama raverdayene.

Ewro desûdi rojî yo ke mi cixare caverdo.

Qet bêguman ewro rojeva Tirkîya de zaf meselê û sorinê muhumî estê. No sebeb ra kî cixare caverdayena mi lêwe nê mewzuyanê muhuman de çiye nîya, lê seba mi na mesela zaf  çîye de muhuma. Coka ez nê mewzu ser o vineta.

Cixare caverdayene qet tewr rojê koşê mezgê mi ra ranêverdenê, heyanî ke mi caverda. Mi vatê belko êndî ez hesîr û koleyê nê mêratî ya, nêşîkîna yaxê xo ra nê dest raxelesnî. Raştî kî nê mêratê serxûrî ra, pêsîrê xo raxelesnayene mesele wa. Hela Xiziro Kal mi rê ame rame, ame comerdenî û rîyê mi ro nîya da û mi kî no mêrat cavirda. Pîya wo ke cixare caverdo, des rojî seba êyî xelê waxt o. Xora nê di heftê verênî zaf zahmet û zaf kî xirab derbaz benê. Beno ke tayê şima vacê "cixarê caverdayena to ra, ma rê çi" heya ez heqe dana şima lê no mewzî seba mi û seba tayê însanan zaf muhîm o. Çunke kulê nê mêratî re derman çîn o. Çunke kulê nê mêratî re çare çîn o. Çunke derdêde bêderman o. Çunke nê serxûrî  zaf milet rehîn û hêsîr gureto. Çûnke zaf kesî nê mêratî rê bîyê qul û kolê. Çunke zaf kesan xo kerd qûrbanê nê mêratî. Çunke zaf kesan çê xo vêşna. Çûnke zaf kesî nê mêratî ver berbenê, zîbenê, nalenê... yanê kam ke yaxê xo do ra nê mêratî dest, henî rehet rehet yaxê xo nê dest ranêxelesneno. Cixare wo mêrat zê dirike zeleqîno însanî ra. Zê însanê gonerî qanê xo soyneno re mordemî. No sebeb ra kî hondayê ke mordemî dest ra ame, xo nê mêratî ra bişevekno û cira dûrî biremo.

Bêguman zerarê xo hem hetê madî ra hem kî hetê manevî ra nêno hesabkerdene. Yanê hesab û kitabê xo çîn o. Her hete ra zerarê xo zaf o. Herçî ra ravê weşîya mordemî keno têser û têmîyan ra. No sebeb ra kî weşîya mordemî zaf muhîm a.

Ê yê ke cixare şimenê hama hama pêroyê xo wazenê ke nê derdî ra raxelesîye. Ama bi sene qeyde? Bi sene formîl?  Mi kî waşte ke ez formîlê cixarî caverdayene biderî şima lê çi hêf ke formîlê nê mêratî çîn o.

Mi ra gore mordem gere ravêrî qerarê cixarî caverdayene xo bi xo bicêro.

Xo cixare caverdayene rê bikero hazir.

Nê qerarê caverdayene bi hês û qeweta xo bidone devamkerdene.

Cawo ke cixare êno şimitene, ûca ra dûrî vindero.

Yanî rindîye a wa ke mordem gere nê mêratê serxûrî mezgê xo ra pak bikero û berzo. Yanê zobîna şansê mordemî û cixare caverdayene çîn o.

Gelê wa û birayan, gelê nas û dostan, gelê hevalan, gelê kêfçîyan, vatena mi şima re aw a ke "şima ke no nusê mi wend bêrenê şima kî êndî naletî re ci bîyarê û nê mêratî caverdenê!"