Gestemerde Online

Ma bi xêr dî gelê hevalan

 Ez bawer kena ke gestemerde.com  bi destek û yardimanê ma roje bi roje eno cayê de zaf muhum. Dîzaynê sîta rê ez nêwazena na saate çîyê vacî. Çike hona newî ya. Waxt ke amê ma kî a taw çîyê vamê. Ma cayê xo de ronîşîme, rexne (eleştiri) bikerîme nêbeno. Bêguman kêmîye esta. Na kêmîye kî waxt ra hal bena. Bîr û bawerîya mi aw a ke, no emeg û ked zayê nêşoro û na kedî re wayîr vecîme.

 Nayê ra çend rojî ravêr hevala ma Türkânê derheqê zon /ziwan de fikrê xo nûsnayî bî. Mi kî waşt naye ser ro çîye binûsnî. Mordem ke zere û can ra zonê xo ra heskerd, bêguman rojê nê rojê kî nûsneno, waneno û qese keno. Honde ke mordem biwazo. Ez bawer kena Türkane rêya virêne ya zonê ma kirmanckî (zazakî) nûisnena. Rastî kî zaf bîya şa.

Asîmîlasîyonê dewleta Tirkîye ra qet bêguman ma pêroyîne para xo gurete. Lêwê na nêheqênî de, ma kî zaf bêveng û sukut mendîme. Zulmê dewla Tirkîye ver ma dest û payî kerdî xo ver û vile kerd çêwt. Ewro kî gere ma ziwan û kulturê xo rê, tarîx û kamîya xo rê wayîr vecîme.

 Se wayîr vecîme?

Çêyanê xo de gere ma ziwanê xo kirmanckî (zazakî) qese bikerîme.

Bi taybetî (özelikle) domamanê xo de qese bikerîme, û cirê rind hîza bikerîme.

Her çî ra ravêrî gere domanî zonê dayika xo bimûsê, û ayê ra dime zonanê bînan bimûsê.

Honde ke ma dest ra amê, ziwanê xo de binûsnîme û biwanîme.

Mi ra gore, zono ke domanan mîyan de nîyame qesekerdene, raxelesîyena û îstîkbalê ê zonî  qet çîno. Bi na rewşe ez qet guman nêkena ke zonê ma çizixa vîndbîyayîşî ra raxelesîyo.

Çike, domanê ma xerîbê zonê dayika xo yê, û cira zaf durî kewtê.

Domanî, zon maye ra musenê û mayê ra kî benê sêwî. Coka vanê “zonê dayike”

Bi taybetî şima mayî ke domananê xo de, zonê ma qese bikerê, ez bawer kena no zonê ma vîndbîyayîşî ra xelesîno ra.

Ziwan tenya bi nûsnayene ranêxelesîno. Ma bizanitêne ke ebi nûsnayene xelesîno ra, ma şodir ra heyanî şan nûsnêne. Hetê nûsnayene ra gelê raye gureta ziwanê ma, labelê (feqet) her kes gorê fekê mintiqa (bölge) xo nûsneno. Na kî çiqas raşt a seba ziwanî? Ma ke jubînî fahm nêkerd, binûisnîme ha binûsnîme. Bi no qeyde şoro, ma bi xo zonê xo dame kiştene.

Çike, Ziwanê xo ser ro ma honde munaqaşe nêkeme.

Alaqa xort û azebanê ma senê na û no derheq de se fikîrîne?

Şarê ma xo mîyan de taybetî kamcî zonî qese keno?

Kokimê ma yê ke teberê welatî rayê, gelo nê kamcî zon qesekenê?

Nê mewzu ser ro gere ma rind vindîme û munaqeşe bikerîme.

Gere ma nayê kî rind bizanîme ke, tenya zon çizixa vîndbîyayîşî de nîyo. Gelê çî vayê vîndbîyayîşî ver ra, xo re raxelesîyene re çêber cêrenê.

Wusênê Gestemerde

Berlin, 19.05.08