Gestemerde Online

Ez nêbiya, ti bîya dayika derdxure
ma mi nêzanitenê ti dayika hêsîran a
ma ti koyanê Gestemerde de gulheşe nêbîya
ez nêbiya, ti bîya sewda serê gilê koyan

Ma ti kam a dakila mi, ma ti kam a delala mi?
ez zana hêsîrê to hêsîrê serê cavkanî bî
ti bîya zê vare heliya û qeliya,
dayika zerevêşayîye ti biya Sêvgulî ti bîya

Ma ti kam a dakila mi, ma ti kama delala mi?
Bal û bejna to ya zirave
kedkara Gestemerde,
pîrîka ma pêroyîne ti biya Harse ti bîya

Ma ti kam a dakila mi, ma ti kam a delala mi?
ti bîya veyvika newîye
sermîyana çêyî
ti nêbîya ware de bîne denê mi
ti bîya veyva Ferzîmeleke ti biya

Ma ti kam a dakila mi, ma ti kam a delala mi?
dayika sêyan bîya merga gomî de
dayika dakilan pêroyîne bîya
ti biya Besra mi ti biya

Ma ti kam a dakila mi, ma ti kam a delala mi?
bêkes û rojesîya mi
dakila Weyselê birayî
ti bîya Gunlaza mi ti bîya

Ma ti kam a dakila mi, ma ti kam a delala mi?
bi reng û vengê to
bêvengênîya merga gomî bîye şên
dengbeja hêcaye
ti bîya Esmera mi ti bîya

Ma ti kam a dakila mi, ma ti kam a delala mi?
ti nêbiya şîya sûka Anqara,
bi hesreta to şî Apo Ali
ti bîya gula çîyan, o bî fîrarê  koyan
ti bîya Zerda mi ti bîya
ez zana sewda şima pêroyîne ju biye

Ma ti kam a dakila mi, ma ti kam a delala mi?
ma ti nêvana çi  gula waran, ma ti nêvana çi
xan û xirabe bîyê êndî warê ma
gula waran ti bîya Sebra mi ti bîya

Ma ti kam a dakila mi, ma ti kam a delala mi?
bi kêf ű eşq biya
kamî bi yaranîya xo milet fîştê huyayîş
ti bîya Qudreta mi ti bîya

Ma ti kam a dakila mi, ma ti kam a delala mi?
ti zana ti dayike biya zerîya to bîye
ti Xanime bîya, ti bîya Xanima Xaniman

Ma ti kam a dakila mi, ma ti kam a delala mi?
zê milaketan bîye
rind û xiraba cîranê xo ra  caran qese nêkerdenê
berîvana mi
gula verojî
ti bîya Gula ma ti bîya

Ma ti kama dakila mi, ma ti kama delala mi?
caran mîyazê xo binê çengî ra kêmî nêbîyenê
zê astarê serê şodirî zîyare bi zîyare cêrênê
feqîrî û hesîrîya xo ver zîbêne
ti  bîya Amika Zelîxane ti bîya

Ma ti kam a dakila mi, ma ti kam a delala mi?
bi darênan non bipotênê qefelîyena xo çîne bîye
verê locina adirî de xeyme daybî piro
caran adir locine de nêşî xora
ti bîya Eta Xanime ti bîya
ez zana ti ronênîya verê sacî ya

Ma ti kam a dakila mi, ma ti kam a Xezala mi?
ez zana ti dayikêde dertxure biya
to ne roje dîye ne tîjî dîye
roj û tîjîya to Keremê to bî

Cibrail